ED য়ে আলফুৰকান এডুকেশ্যনেল ট্ৰাষ্ট বিকানেৰৰ প্ৰাক্তন সভাপতি মহম্মদ ছাদিক ওৰফে ছাদিক খানক গ্ৰেপ্তাৰ কৰে। ৰাজহুৱা অনুদানৰ বৃহৎ পৰিমাণৰ অপব্যৱহাৰ, অবৈধ নগদ ধনৰ নেটৱৰ্ক চলোৱা, বিদেশত সন্দেহজনক সংযোগ বজাই ৰখা, উগ্ৰবাদৰ সৈতে জড়িত ব্যক্তিৰ সৈতে সম্পৰ্ক ৰখা আদি গুৰুতৰ অভিযোগৰ সন্মুখীন হৈছে।
ছাদিক খানক জয়পুৰ ED ৰ দলে ধন সৰবৰাহৰ গোচৰত গ্ৰেপ্তাৰ কৰিছে। ইডিয়ে কয় যে, ছাদিকে বৃহৎ পৰিমাণৰ ৰাজহুৱা অনুদানৰ অপব্যৱহাৰ, অবৈধ নগদ ধনৰ নেটৱৰ্ক চলোৱা, বিদেশত সন্দেহজনক সংযোগ বজাই ৰখা, উগ্ৰবাদৰ সৈতে জড়িত ব্যক্তিৰ সৈতে সম্পৰ্ক ৰখাকে ধৰি গুৰুতৰ অভিযোগৰ সন্মুখীন হৈছে। গ্ৰেপ্তাৰৰ পিছতে ছাদিকক জয়পুৰৰ বিশেষ পিএমএলএ আদালতত হাজিৰ কৰোৱা হয় আৰু আদালতে তেওঁক তিনিদিনৰ বাবে ED ৰ জিম্মালৈ প্ৰেৰণ কৰে। এতিয়া ৬ ডিচেম্বৰলৈকে তেওঁক অধিক জেৰা কৰিব ইডিয়ে।
ৰাজস্থান আৰক্ষীৰ দুটা এফআইআৰ আৰু এটা ইনপুটৰ ভিত্তিত ED য়ে এই তদন্ত আৰম্ভ কৰিছিল। অভিযোগ কৰা হৈছে যে ছাদিক উগ্ৰবাদ বিয়পোৱা আৰু বলপূৰ্বক ধৰ্মান্তৰকৰণৰ লগত জড়িত আছিল। বহিঃৰাজ্যৰ কেইবাটাও সন্দেহজনক সংগঠনৰ সৈতে তেওঁৰ সম্পৰ্ক আছিল। তেওঁৰ একাউণ্টৰ পৰা কোটি কোটি টকাৰ সন্দেহজনক লেনদেন কৰা হৈছিল। হত্যাৰ চেষ্টা আৰু অবৈধ অস্ত্ৰ ৰখাৰ অভিযোগো উত্থাপন হৈছে তেওঁৰ বিৰুদ্ধে।
ED ৰ তদন্তত প্ৰকাশ পাইছে যে, ছাদিকে আলফুৰকান এডুকেচনেল ট্ৰাষ্ট স্থাপন কৰিছিল, যাৰ জৰিয়তে মছজিদ-ই-আইছাৰ বাবে বৃহৎ পৰিমাণৰ নগদ ধন সংগ্ৰহ কৰা হৈছিল। অৱশ্যে এই অনুদানৰ কোনো ৰেকৰ্ড ৰখা হোৱা নাছিল। ছাদিকে সমগ্ৰ ধন নিজৰ লগত ৰাখিছিল। যিবোৰ তেওঁ বিদেশ ভ্ৰমণ, ব্যক্তিগত খৰচ, অবৈধ কাম-কাজৰ বাবে ব্যৱহাৰ কৰিছিল।
কোনো বৈধ উপাৰ্জন নোহোৱাকৈয়ে বহু বছৰ ধৰি কেৱল জুৱা, অবৈধ সুৰাৰ ব্যৱসায়, দেশত নিৰ্মিত পিষ্টলৰ ব্যৱসায় আদি নগদ ধনৰ ভিত্তিত অবৈধ কাৰ্য্যকলাপৰ জৰিয়তে ধন উপাৰ্জন কৰিছিল। ইয়াৰ পূৰ্বে এক অভিযানত আৰক্ষীয়ে তেওঁৰ পৰা দেশত নিৰ্মিত তিনিটা পিষ্টল আৰু সজীৱ কাৰ্টিজ উদ্ধাৰ কৰে। তদন্তত প্ৰকাশ পাইছে যে ছাদিকে কেইবাবাৰো বাংলাদেশ, নেপাল, কাটাৰ, ওমান ভ্ৰমণ কৰিছিল। এই ভ্ৰমণসমূহৰ বাবে সংগ্ৰহ কৰা নগদ ধন ব্যৱহাৰ কৰি পুঁজিৰ ব্যৱস্থা কৰা হৈছিল যাৰ বাবে কোনো একাউণ্ট ৰখা হোৱা নাছিল।
ধৰ্ম আৰু সমাজ সেৱাৰ আঁৰত অবৈধ ধন আৰু উগ্ৰ কাৰ্যকলাপৰ প্ৰচাৰ চলাই থকা নেটৱৰ্কসমূহ ভাঙি পেলোৱাৰ দিশত ছাদিকক গ্ৰেপ্তাৰ এক বৃহৎ পদক্ষেপ। বৰ্তমান ED ৰ অধিক তদন্ত অব্যাহত আছে।
