পেৰিছ অলিম্পিকৰ পৰা আহিছে ভাল খবৰ। বিশ্বৰ সৰ্ববৃহৎ প্ৰতিযোগিতাখনৰ ষষ্ঠ দিনটোত পুনৰবাৰ জিলিকি উঠিছে শ্বুটাৰ মনু ভাকৰ। এইবাৰ মহিলাৰ ২৫ মিটাৰ পিষ্টলৰ ফাইনেলত প্ৰৱেশ কৰিছে মনু ভাকৰে।
ফাইনেলত স্থান নিশ্চিত কৰাৰ লগে লগে মনু ভাকৰৰ জৰিয়তে ভাৰতবাসীয়ে আৰু এটা পদক লাভ কৰাৰ সম্ভাৱনা প্ৰকট হৈ উঠিছে। পদকৰ বাবে মনু ভাকৰে কাইলৈ অৰ্থাৎ ৩ আগষ্টত ফাইনেলত অৱতীৰ্ণ হ’ব।
কোৱালিফায়িং ৰাউণ্ডত মুঠ ৫৯০ পইণ্টেৰে দ্বিতীয় স্থানত থকা মনু ভাকৰে শনিবাৰে ভাৰতীয় সময় অনুসৰি দুপৰীয়া ১ বজাত পদক অৰ্জনৰ বাবে শ্বুটিং ৰেঞ্জত নামিব।
ভাৰতীয় শ্বুটাৰগৰাকীয়ে ২৫ মিটাৰ পিষ্টলৰ কোৱালিফায়িং ৰাউণ্ডৰ প্ৰিছিজন ৰাউণ্ডত ২৯৪ পইণ্ট আৰু ৰেপিড ৰাউণ্ডত ২৯৬ পইণ্ট সংগ্ৰহ কৰি দ্বিতীয় স্থানত থাকে।
উল্লেখ্য যে, চলিত অলিম্পিকত মনু ভাকৰে এই পৰ্যন্ত লাভ কৰিছে দুটা ব্ৰঞ্জ পদক। অলিম্পিক ইতিহাসত একেটা অলিম্পিকত দুটা পদক অৰ্জন কৰা মনু ভাকৰ একমাত্ৰ ভাৰতীয়। যদিহে শনিবাৰে মহিলাৰ ২৫ মিটাৰ পিষ্টলৰ ফাইনেলত মনুৱে পদক অৰ্জন কৰে তেন্তে ভাৰতৰ ক্ৰীড়া ক্ষেত্ৰৰ বাবে হ’ব এক ঐতিহাসিক ক্ষণ।
