থাইলেণ্ডৰ দক্ষিণ প্ৰদেশ ছংখলাৰ এখন বিদ্যালয়ত গুলীচালনাৰ ঘটনা সংঘটিত হয়। স্থানীয় কৰ্তৃপক্ষই ছ’চিয়েল মিডিয়াত এই কথা নিশ্চিত কৰে। এক প্ৰতিবেদন অনুসৰি, ছংখলা প্ৰদেশৰ এখন বিদ্যালয়ত অজ্ঞাত সংখ্যক ছাত্ৰ-ছাত্ৰী আৰু শিক্ষকক পণবন্দী কৰি ৰখা হয়। হাট য়াই জিলাৰ পাটং মহকুমাৰ পাটং প্ৰথান খিৰিৱিট স্কুলত সংঘটিত হয় এই ঘটনা।
স্থানীয় থাই সংবাদ মাধ্যমৰ মতে, বন্দুকধাৰীয়ে বিদ্যালয়খনত প্ৰৱেশ কৰি গুলীচালনা কৰাৰ ফলত এজন শিক্ষক আহত হয় আৰু তেওঁক চিকিৎসালয়লৈ লৈ যোৱা হয়। কিছুমান খবৰত শিশুসহ কেইবাজনো লোক আহত হোৱাৰ কথা উল্লেখ কৰিছে যদিও আহতসকলৰ সঠিক সংখ্যা এতিয়াও স্পষ্ট হোৱা নাই। বৰ্তমানেও বিদ্যালয়ৰ ভিতৰত আৱদ্ধ হৈ আছে কেইবাগৰাকী ছাত্ৰ-ছাত্ৰী আৰু শিক্ষক। থুং লুং আৰক্ষী থানাই ঘেৰাও কৰিছে বিদ্যালয়খন। বিশেষ অভিযান ইউনিট আৰু উদ্ধাৰকাৰী দল ঘটনাস্থলীত উপস্থিত হৈ পৰিস্থিতি নিয়ন্ত্ৰণৰ চেষ্টা চলায়।
১৮ বছৰীয়া খেম নামৰ সন্দেহজনক লোকজনে বিদ্যালয়খনৰ প্ৰথম মহলাৰ জনসংযোগ কক্ষত এগৰাকী মহিলা কৰ্মচাৰীক পণবন্দী কৰি ৰাখিছিল। একাংশ খবৰ অনুসৰি ৫ নং মথায়োম (১১ম শ্ৰেণী)ৰ এজন ছাত্ৰকো পণবন্দী কৰি লোৱা হৈছে। আৰক্ষীয়ে বিদ্যালয়খনৰ আশে-পাশে থকা অঞ্চলটো ছীল কৰি আলোচনাৰ চেষ্টা চলাইছে।
স্থানীয় কৰ্তৃপক্ষ আৰু আৰক্ষীয়ে এই পৰিস্থিতি নিৰীক্ষণ কৰি আছে। এতিয়ালৈকে কোনো লোকৰ মৃত্যু হোৱা নাই যদিও আহতসকলৰ সংখ্যা বৃদ্ধি পাব পাৰে। উদ্ধাৰ অভিযান চলি আছে, আৰু অনাগত ঘণ্টাত আৰু অধিক আপডেট হোৱাৰ সম্ভাৱনা আছে। থাইলেণ্ড চৰকাৰ আৰু আৰক্ষীয়ে জনসাধাৰণক শান্ত হৈ থাকিবলৈ আৰু উৰাবাতৰি বিশ্বাস নকৰিবলৈ আহ্বান জনাইছে।
