বাংলাদেশৰ ত্ৰয়োদশ সংসদীয় নিৰ্বাচনত বৃহৎ বিজয়ৰ পিছত ১৭ ফেব্ৰুৱাৰীত ঢাকাৰ ৰাষ্ট্ৰীয় সংসদৰ চাউথ প্লাজাত বাংলাদেশ জাতীয়তাবাদী দলৰ নতুন সাংসদসকলে শপত গ্ৰহণ কৰে।
বিএনপিৰ অধ্যক্ষ তাৰিক ৰহমানে মুখ্য উপদেষ্টা মহম্মদ ইউনুছক যথেষ্ট আঘাত কৰে। সাংবিধানিক সংস্কাৰ পৰিষদৰ সদস্য হিচাপে শপত গ্ৰহণ কৰিবলৈ অস্বীকাৰ বিএনপিৰ সাংসদসকলৰ।
মঙলবাৰে পুৱা মুখ্য নিৰ্বাচন আয়ুক্ত এ এম এম নাছিৰ উদ্দিনে শপত গ্ৰহণ কৰে, দেশৰ সংবিধান অনুসৰি। দ্বাদশ সংসদৰ অধ্যক্ষ আৰু উপাধ্যক্ষৰ পদ খালী হোৱাৰ বাবে শপত গ্ৰহণ কৰে মুখ্য নিৰ্বাচন আয়ুক্তই। সংসদ সচিবালয়ৰ সম্পাদক কানিজ মৌলাই শপতগ্ৰহণ অনুষ্ঠান পৰিচালনা কৰে।
বাংলাদেশৰ সংবাদ মাধ্যমে প্ৰকাশ কৰা অনুসৰি বিএনপিৰ সাংসদসকলে সাংবিধানিক সংস্কাৰ পৰিষদৰ সদস্য হিচাপে শপত গ্ৰহণ নকৰে।
শপত গ্ৰহণৰ পিছত বিএনপিৰ জ্যেষ্ঠ নেতা চালাহুদ্দিন আহমেদে দলৰ সাংসদসকলক সম্বোধন কৰি সাংবিধানিক সংস্কাৰ পৰিষদৰ সন্দৰ্ভত নিজৰ স্থিতি স্পষ্ট কৰে। তেওঁ উল্লেখ কৰে যে, বৰ্তমানৰ সংবিধানত সাংবিধানিক সংস্কাৰ পৰিষদৰ কোনো ব্যৱস্থা অন্তৰ্ভুক্ত কৰা হোৱা নাই। যদিহে গণভোটৰ ভিত্তিত এনে পৰিষদ গঠন কৰা হয়, তেন্তে প্ৰথমে ইয়াক আনুষ্ঠানিকভাৱে সংবিধানত অন্তৰ্ভুক্ত কৰাৰ প্ৰয়োজন হ’ব।
তেওঁ বুজাই দিয়ে যে, শপত গ্ৰহণৰ ফৰ্মেট সংবিধানৰ তৃতীয় অনুসূচীত উল্লেখ কৰা হৈছে, আৰু বৰ্তমান সাংসদসকলে সেই অনুসৰি শপত গ্ৰহণ কৰিছে। সংস্কাৰ পৰিষদ সম্পৰ্কীয় বিধান সাংবিধানিক অনুসূচীত অন্তৰ্ভুক্ত নোহোৱালৈকে আৰু ৰাষ্ট্ৰীয় বিধানসভাই সাংবিধানিকভাৱে অনুমোদন নকৰালৈকে ইয়াৰ সদস্যসকলে গ্ৰহণ কৰা শপতনামাৰ কোনো আইনী ভিত্তি নাথাকিব।
ছালাহুদ্দিন আহমেদে পুনৰ কয় যে, বিএনপিয়ে সদায় সাংবিধানিক প্ৰক্ৰিয়াক সন্মান জনাই আহিছে আৰু কৰি যাব। লগতে তেওঁ উল্লেখ কৰে যে, দলৰ অধ্যক্ষ তাৰিক ৰহমানৰ নিৰ্দেশনা অনুসৰি এই সিদ্ধান্ত লোৱা হৈছে।
যদিও সকলো নিৰ্বাচিত সাংসদে সংসদৰ সদস্য হিচাপে শপত গ্ৰহণ কৰিছে, তথাপিও কাৰিকৰী আৰু সাংবিধানিক অসামঞ্জস্যৰ বাবে সম্প্ৰতি সংস্কাৰ পৰিষদৰ অংশ হ’বলৈ অনিচ্ছুক। বিএনপিৰ মতে স্পষ্ট আৰু বৈধ আইনী কাঠামো স্থাপন নোহোৱালৈকে এই প্ৰক্ৰিয়াত অংশগ্ৰহণ কৰাটো উপযুক্ত নহ’ব।
বিএনপিৰ অধ্যক্ষ তাৰিক ৰহমানে ঢাকা-১৭ সমষ্টিৰ পৰা সংসদ সদস্য হিচাপে শপত গ্ৰহণ কৰে। শপত গ্ৰহণ অনুষ্ঠানত তেওঁৰ পত্নী জুবাইদা ৰহমান আৰু কন্যা জাইমা ৰহমান উপস্থিত থাকে।
