ইৰাণৰ ওপৰত আমেৰিকা-ইজৰাইলৰ যৌথ আক্ৰমণৰ আজি সপ্তম দিন। দুয়োপক্ষই ইৰাণৰ ওপৰত চলাইছে ধাৰাবাহিক আক্ৰমণ। খবৰ অনুসৰি, বিপজ্জনক বেলিষ্টিক মিছাইল আৰু এয়াৰ জেটৰ পৰা আৰম্ভ কৰি ড্ৰোন আক্ৰমণ আৰু ক্লাষ্টাৰ বোমালৈকে সকলো ব্যৱহাৰ কৰা হৈছে এই যুদ্ধত।
এই আক্ৰমণৰ ফলত অসংখ্য লোকৰ মৃত্যু হৈছে। ইৰাণ আৰু ইজৰাইলৰ লোকেই নহয়, ইৰাণ, আমেৰিকা, কুৱেইট, ওমানকে ধৰি বিভিন্ন দেশৰ নাগৰিকও এই ভুক্তভোগীসকলৰ ভিতৰত আছে।
খবৰ অনুসৰি, ইৰাণৰ মিনাবত ২৮ ফেব্ৰুৱাৰীত এখন বিদ্যালয়ত ক্ষেপণাস্ত্ৰ আক্ৰমণত ১৭৫ গৰাকী স্কুলীয়া ছাত্ৰী আৰু কৰ্মচাৰীকে ধৰি কমেও ১২৩০ জন লোক নিহত হয়।
১ মাৰ্চত ইজৰাইলৰ বেইট শ্বেমেছত ইৰাণৰ ক্ষেপণাস্ত্ৰ আক্ৰমণত ৯ জন সাধাৰণ নাগৰিককে ধৰি ১১ জন লোক নিহত হৈছিল। নিহত হৈছে ৬ গৰাকী মাৰ্কিন সেৱাৰ সদস্য। ২ মাৰ্চত লেবাননত ইজৰাইলৰ আক্ৰমণত কমেও ৭৭ জন লোক নিহত হয়। বাহৰেইনৰ ছলমান ঔদ্যোগিক চহৰত ক্ষেপণাস্ত্ৰৰ বাধাৰ ফলত অগ্নিকাণ্ডত এজন লোকৰ মৃত্যু হয়। কুৱেইটত ইৰাণৰ আক্ৰমণত দুজন কুৱেইটী জোৱানসহ ৪ জন লোক নিহত হয়। ওমানত উপকূলৰ ওচৰত মাৰ্শ্বেল দ্বীপপুঞ্জৰ পতাকা থকা প্ৰডাক্ট টেংকাৰ এখনত প্ৰজেক্টাইলৰ খুন্দাত এজন লোকৰ মৃত্যু হয় আৰু ইউ এ ইৰ তিনিজন জোৱান নিহত হয়।
এই আক্ৰমণে ইৰাণৰ সৰ্বোচ্চ নেতা আয়াতুল্লাহ আলী খামেনেইকে ধৰি সৰ্বোচ্চ নেতৃত্বৰ প্ৰাণ কাঢ়ি নিয়ে। ইফালে মধ্যপ্ৰাচ্যৰ পৰিস্থিতিৰ অৱনতি ঘটিছিল। ইফালে ইৰাণে আকৌ এই ধাৰাবাহিক আক্ৰমণৰ প্ৰতিশোধ লয়।
উপসাগৰীয় দেশসমূহত থকা আমেৰিকাৰ ঘাটি আৰু দূতাবাসলৈও ইৰাণে ড্ৰোন আৰু মিছাইল নিক্ষেপ কৰে। ইজৰাইলে লেবাননত হিজবুল্লাহৰ স্থানত আক্ৰমণ চলায়। ইৰাণত মৃত্যু হোৱা লোকৰ সংখ্যা ১১৪৫ জনলৈ বৃদ্ধি পোৱাৰ বিপৰীতে বিশ্বজুৰি তেলৰ মূল্যও বৃদ্ধি পাই প্ৰতি বেৰেলত ১৫০ ডলাৰ হৈছেগৈ।
