ইৰাণ-আমেৰিকা-ইজৰাইল সংঘাতৰ মাজতে ডুবাইত সংঘটিত হৈছে এক বৃহৎ দুৰ্ঘটনা। ডুবাই মিডিয়া অফিচে আনুষ্ঠানিকভাৱে নিশ্চিত কৰিছে যে, কিছু সময়ৰ পূৰ্বে ডুবাই আন্তঃৰাষ্ট্ৰীয় বিমানবন্দৰৰ ওচৰত দুখন ড্ৰ’ন দুৰ্ঘটনাগ্ৰস্ত হৈছিল। এই ঘটনাত ৪জন লোক আহত হয়। সামান্য আহত দুজন ঘানীয়াৰ নাগৰিক, এজন বাংলাদেশী নাগৰিক আৰু এজন ভাৰতীয় নাগৰিক।
এই ড্ৰ’নসমূহৰ উৎপত্তি ইৰাণৰ পৰা হৈছিল নে আন কোনো কাৰণত নিক্ষেপ কৰা হৈছে সেয়া এতিয়াও স্পষ্ট হোৱা নাই যদিও চলি থকা সংঘাতৰ বাবে ইৰাণৰ ড্ৰ’ন আৰু মিছাইল আক্ৰমণৰ বাবে অঞ্চলটোত নিৰাপত্তাজনিত সতৰ্কতা অৱলম্বন কৰা হৈছে। ইউ এ ইৰ এয়াৰ ডিফেন্স চিষ্টেমে বিগত কেইঘণ্টামানৰ ভিতৰত কেইবাটাও ড্ৰ’ন আৰু মিছাইল আটক কৰিছে। ডুবাই বিমানবন্দৰ বিশ্বৰ অন্যতম ব্যস্ত বিমানবন্দৰ যদিও বৰ্তমান বিমান সেৱা স্বাভাৱিকভাৱে চলি আছে আৰু ইয়াত কোনো ডাঙৰ ব্যাঘাত হোৱা নাই।
ইউ এ ই, চৌদি আৰব, কাটাৰ, বাহৰেইন, কুৱেইটকে ধৰি উপসাগৰীয় দেশসমূহৰ বিৰুদ্ধে ইৰাণে প্ৰত্যাক্ৰমণ তীব্ৰতৰ কৰি তোলাৰ সময়তে এই কাণ্ড সংঘটিত হৈছে। আবুধাবিৰ ৰুৱাইছ শোধনাগাৰতো ড্ৰ’ন আক্ৰমণৰ ফলত জুই লাগি বন্ধ কৰিবলগীয়া হয়। ভাৰত চৰকাৰ আৰু ডুবাইত থকা ভাৰতীয় দূতাবাসে আহত ভাৰতীয় নাগৰিকজনৰ পৰিস্থিতি নিৰীক্ষণ কৰি প্ৰয়োজনীয় সহায় আগবঢ়াবলৈ সাজু হৈছে।
যুদ্ধ আৰম্ভ হোৱাৰ পৰা অৰ্থাৎ ২০২৬ চনৰ ২৮ ফেব্ৰুৱাৰীৰ পৰাই এই আক্ৰমণ চলি আহিছে।ইৰাণে উপসাগৰীয় দেশসমূহলৈ শ শ মিছাইল-ড্ৰোন মিছাইল নিক্ষেপ কৰাৰ বিপৰীতে ইউ এ ইৰ দৰে দেশসমূহে ইয়াৰে অধিকাংশই বাধা দিছে।
ভাৰত চৰকাৰে ইউ এ ইত বসবাস কৰা ভাৰতীয় নাগৰিকৰ বাবেও এক পৰামৰ্শ জাৰি কৰিছে। ডুবাই আৰু আবুধাবিত বসবাস কৰা ভাৰতীয়সকলক সজাগ হৈ থাকিবলৈ আৰু স্থানীয় কৰ্তৃপক্ষৰ নিৰ্দেশনা মানি চলিবলৈ পৰামৰ্শ দিয়া হৈছে। যদি কোনো ভাৰতীয় নাগৰিক আক্ৰান্ত হৈছে তেন্তে ডুবাইত থকা ভাৰতীয় দূতাবাস (+971-4-3971222) বা আবুধাবি (+971-2-4492700)ৰ সৈতে যোগাযোগ কৰা নিৰ্দেশ দিছে।
