শিশুসকলক শৈশৱৰ পৰাই গাখীৰ সেৱন কৰাই হাড়, দাঁত আৰু শাৰীৰিক বৃদ্ধিৰ বাবে তৈয়াৰ কৰা হয়। গাখীৰ সেৱন কৰাটো অত্যন্ত গুৰুত্বপূৰ্ণ আৰু স্বাস্থ্যৰ বাবে উপকাৰী। এই স্বাস্থ্যসন্মত পানীয় সকলোৰে খাদ্য তালিকাত অন্তৰ্ভুক্ত কৰিব লাগে।
কিন্তু কিছুমান খাদ্যৰ অত্যাধিক গ্ৰহণে কেতিয়াবা পাৰ্শ্বক্ৰিয়াও কৰিব পাৰে। গাখীৰৰ ক্ষেত্ৰতো একেই কথা। দিনটোত এগিলাচ বা দুগিলাচ গাখীৰ সেৱন কৰাটো ঠিকেই, যদিও ইয়াতকৈ বেছিকৈ সেৱন কৰিলে শৰীৰৰ পক্ষে ক্ষতিকাৰক হ’ব পাৰে। এইবিষয়ে সবিশেষ জানো আহক-
গাখীৰৰ পাৰ্শ্বক্ৰিয়া
১)এক প্ৰতিবেদন অনুসৰি পুষ্টিকৰ খাদ্যত গাখীৰ অন্তৰ্ভুক্ত কৰাটো অতি প্ৰয়োজনীয় কাৰণ ইয়াত বহুতো গুৰুত্বপূৰ্ণ ভিটামিন আৰু খনিজ পদাৰ্থ থাকে, যেনে কেলচিয়াম, ফছফৰাছ, পটাছিয়াম, চেলেনিয়াম, ভিটামিন ডি, প্ৰটিন, চৰ্বি, কাৰ্বহাইড্ৰেট, জিংক, ইত্যাদি। কিন্তু অত্যধিক গাখীৰ খোৱাৰ ফলত কিছুমান মানুহৰ পাৰ্শ্বক্ৰিয়া হ’ব পাৰে। গৰুৰ গাখীৰৰ চাহ সকলোৱে সহজে হজম কৰিব নোৱাৰে।
২)গাখীৰ খোৱাৰ সুফল অসুবিধাতকৈ বেছি হ’লেও কিছুমান মানুহে তথাপিও ইয়াক পৰিহাৰ কৰা উচিত। কিছুমান মানুহৰ দুগ্ধজাত সামগ্ৰীৰ প্ৰতি এলাৰ্জী হয় বা লেক্ট’জ অসহিষ্ণুতা থাকে। গাখীৰৰ দৰে দুগ্ধজাত সামগ্ৰীৰ অত্যধিক সেৱনে আন আন সমস্যাও সৃষ্টি কৰিব পাৰে, যেনে শালমইনা আৰু হৃদযন্ত্ৰৰ সমস্যা।
৩) কিছুমান মানুহৰ শালমইনাৰ প্ৰৱণতা বেছি। চুলিৰ গুৰিবোৰ তেল বা মৃত ছালৰ দ্বাৰা বন্ধ হৈ পৰাৰ ফলত ফোঁহা, পিম্পল, শালমইনা আদিৰ সৃষ্টি হ’লে এনে হয়। এটা অধ্যয়নৰ মতে গাখীৰ খোৱা আৰু পনীৰ খোৱাৰ ফলত ব্ৰেকআউটৰ সম্ভাৱনা যথেষ্ট বৃদ্ধি পায়। গৱেষকসকলে নিশ্চিত নহয় যে, কিয় এনেকুৱা হয়, কিন্তু তেওঁলোকৰ মতে দুগ্ধ খোৱাৰ প্ৰতি প্ৰদাহজনিত সঁহাৰি দায়ী হ’ব পাৰে।
৪) অত্যধিক গাখীৰ খোৱাৰ ফলত ছালৰ প্ৰদাহজনিত অৱস্থা হ’ব পাৰে। কিছুমান মানুহৰ গাখীৰ আৰু গাখীৰৰ পৰা তৈয়াৰী সামগ্ৰী অত্যধিক সেৱন কৰিলে একজিমা, ছাল চেপেটা, খজুৱতি আদি হ’ব পাৰে।
৫) গৱেষকসকলৰ মতে ৩ বছৰৰ তলৰ ৩% শিশু আৰু কেঁচুৱাৰ গাখীৰৰ পৰা কোনো ধৰণৰ এলাৰ্জী থাকে। এই অৱস্থা সাধাৰণতে সময়ৰ লগে লগে সমাধান হয়। এই এলাৰ্জী তেতিয়া হয়, যেতিয়া দুগ্ধজাত সামগ্ৰীয়ে প্ৰদাহজনিত প্ৰতিক্ৰিয়াৰ সূচনা কৰে।
৬) প্ৰায় ৬৮% লোক লেক্ট’জ অসহিষ্ণুতাত ভুগিছে। লেক্ট’জ অসহিষ্ণুতা পেট ফুলা, বমি, ডায়েৰিয়া, গেছ, পেটৰ বিষ, ক্ৰেম্প, বমি আদিৰ বাবে এক বিপদজনক কাৰক।
৭) অত্যধিক গাখীৰ খোৱাৰ ক্ষতি প্ৰায়ে ইয়াত লেক্ট’জ বেছি আৰু চেচুৰেটেড ফেটৰ বাবে হয়। এক কাপ গাখীৰত প্ৰায় ১৮০ কেলৰি থাকে। এই পৰিস্থিতিত সম্পূৰ্ণ চৰ্বিযুক্ত গাখীৰ অত্যধিক সেৱনে কেলৰি গ্ৰহণ বৃদ্ধি কৰে, যাৰ ফলত ওজন বৃদ্ধিৰ সম্ভাৱনা বৃদ্ধি পায়। কেলৰিৰ ভাৰসাম্য ৰক্ষা কৰিবলৈ স্বাস্থ্যসন্মত খাদ্য বজাই ৰাখিব লাগিব আৰু শাৰীৰিকভাৱে সক্ৰিয় হৈ থাকিব লাগিব।
৮) সম্পূৰ্ণ চৰ্বিযুক্ত গাখীৰ খালে আপোনাৰ তেজত এল ডি এল (বেয়া) কলেষ্টেৰলৰ মাত্ৰা বৃদ্ধি পাব পাৰে। যিহেতু সম্পূৰ্ণ চৰ্বিযুক্ত গাখীৰত সংপৃক্ত চৰ্বি থাকে, গতিকে অত্যধিক সেৱনে হৃদৰোগৰ সম্ভাৱনা বৃদ্ধি কৰিব পাৰে। পূৰ্বতে হৃদৰোগ থকা লোকসকলে সম্পূৰ্ণ চৰ্বিযুক্ত গাখীৰ অত্যধিক সেৱন নকৰিব লাগে।
৯) লেক্ট’জ অসহিষ্ণুতা থকা লোকে লেক্ট’জ সহজে হজম কৰিব নোৱাৰাৰ বাবেও পাচনতন্ত্ৰৰ সমস্যা হ’ব পাৰে। লেক্ট’জ হৈছে গাখীৰত পোৱা চেনি। ইয়াৰ ফলত পেট ফুলা, ডায়েৰিয়া, পেটৰ বিষ হ’ব পাৰে।
