প্ৰধানমন্ত্ৰী শ্বেখ হাছিনাৰ শাসন ব্যৱস্থাৰ নাটকীয় পতনৰ পিছত ভাৰত চৰকাৰে বাংলাদেশৰ সামৰিক নেতৃত্বৰ সৈতে যোগাযোগত আছে বুলি মঙলবাৰে এক সূত্ৰই প্ৰকাশ কৰিছে।
উল্লেখ্য যে, যোৱা মাহত বাংলাদেশত চৰকাৰী চাকৰিৰ বিতৰ্কিত কোটা ব্যৱস্থা বাতিল কৰাৰ দাবী জনোৱা প্ৰতিবাদ আৰু হিংসাত্মক পৰিস্থিতি উতলি উঠাৰ পিছতে সোমবাৰে হাছিনাই পদত্যাগ কৰি ভাৰতলৈ পলায়ন কৰে।
চলিত জানুৱাৰী মাহত বিৰোধীয়ে বৰ্জন কৰা সাধাৰণ নিৰ্বাচনত ক্ৰমাগত চতুৰ্থবাৰৰ বাবে জয়ী হৈছিল হাছিনা। ইয়াৰ পিছতেই দেশখনত চাকৰি সংৰক্ষণক লৈ আৰম্ভ হোৱা প্ৰতিবাদ হাছিনাক ক্ষমতাচ্যুত কৰাৰ প্ৰচাৰ অভিযানলৈ পৰিণত হয়।
ভাৰত চৰকাৰৰ এক শীৰ্ষ সূত্ৰই জনোৱা অনুসৰি, ‘স্থিতিশীলতা আৰু শান্তি গুৰুত্বপূৰ্ণ। ভাৰতীয় কৰ্তৃপক্ষই ঢাকাত সামৰিক নেতৃত্বৰ সৈতে যোগাযোগত আছে।’
ভাৰত চৰকাৰৰ শীৰ্ষ বিষয়াসকলে বাংলাদেশৰ সেনা প্ৰধান ৱাকাৰ-উজ-জামানৰ সৈতে যোগাযোগ কৰি আইন-শৃংখলা বজাই ৰাখিবলৈ আৰু হিংসা বন্ধ কৰিবলৈ অনুৰোধ জনাইছে বুলি সূত্ৰসমূহে প্ৰকাশ কৰিছে।
এটা সূত্ৰই কয় যে ভাৰতৰ বিষয়াসকলে তেওঁলোকক জনাইছে যে যদিহে তেওঁলোকক শান্তি আৰু আইন-শৃংখলা বজাই ৰাখিবলৈ কোনো ধৰণৰ সহায়ৰ প্ৰয়োজন হয়, তেন্তে ভাৰত সকলো সমৰ্থন আগবঢ়াবলৈ সাজু। হাছিনা ভাৰতলৈ অহাৰ পিছত এইটো এটা ডাঙৰ পৰিঘটনা, আৰু এতিয়া ভাৰত নতুন নেতৃত্বৰ সৈতে যোগাযোগত আছে।
উল্লখ্য যে, ৰাজনৈতিক সংকটৰ মাজতে সমগ্ৰ বাংলাদেশত সংঘটিত হিংসাত্মক পৰিস্থিতিত ১০০ জনতকৈ অধিক লোকৰ মৃত্যু হোৱা বুলি মঙলবাৰে বাতৰি প্ৰকাশ পাইছে যদিও বৰ্তমান পৰিস্থিতি স্বাভাৱিক অৱস্থালৈ ঘূৰি অহাৰ লক্ষণ দেখা গৈছে।
সোমবাৰৰ দিনটোৰ অশান্তি আৰু নিশাৰ উত্তেজনাৰ অন্তত মঙলবাৰে পুৱা ঢাকাৰ পৰিস্থিতি বহুলাংশে শান্ত হৈ পৰিছে।
