বৃহস্পতিবাৰে পেৰিছ অলিম্পিকৰ ফাইনেলত অযোগ্য বুলি ঘোষণা কৰাৰ পাছত মহিলা মল্লযুঁজাৰু বিনেশ ফ’গাটে ইয়াৰ উচিত বিচাৰৰ বাবে ক’ৰ্ট অৱ অৰ্বিট্ৰেচন ফ’ৰ স্প’টৰ্ছ (CAS)ৰ ওচৰত জনাই আবেদন। শেহতীয়া তথ্য অনুসৰি, এই বিষয় সন্দৰ্ভত অহা ১৩ আগষ্টৰ সন্ধিয়া ৬ বজাৰ ভিতৰত সিদ্ধান্ত ল’ব CAS য়ে।
উল্লেখ্য যে, ৭ আগষ্ট বৃহস্পতিবাৰে অনুষ্ঠিত হ’বলগীয়া ফাইনেলৰ পুৱা ওজন জোখাৰ সময়ত নিৰ্ধাৰিত সীমাতকৈ ১০০ গ্ৰাম ওজন বেছি হোৱা বাবে বিনেশ ফ’গাটক মহিলাৰ ৫০ কেজি ওজন শাখাৰ ফাইনেলৰ পূৰ্বে অযোগ্য বুলি ঘোষণা কৰা হৈছিল। অলিম্পিকত মল্লযুঁজ নিয়ন্ত্ৰণ কৰা সংস্থা ইউনাইটেড ৱ’ৰ্ল্ড ৰেছলিং (UWW) ৰ নিয়ম অনুসৰি ওজনৰ মাত্ৰা অতিৰিক্ত হোৱা বাবে যিকোনো মল্লযুঁজাৰুক সমগ্ৰ প্ৰতিযোগিতাখনৰ পৰাই অযোগ্য বুলি ঘোষণা কৰা হয়। খেলুৱৈ গৰাকীয়ে পদক অৰ্জন কৰাৰ অৱস্থাত থাকিলেও তেওঁ পদক লাভ কৰিব নোৱাৰে।
বিনেশৰ ক্ষেত্ৰতো ঠিক একে কথাই হৈছে। মাত্ৰ ১০০ গ্ৰাম অতিৰিক্ত ওজনৰ বাবেই তেওঁক ফাইনেল খেলৰ পৰা বিৰত ৰখা হয়। যিহেতু তেওঁ ইতিমধ্যে ফাইনেলত প্ৰৱেশ কৰিছিল, গতিকে তেওঁ ৰূপৰ পদক লাভ কৰাৰ বাবে যোগ্য আছিল। কিন্তু সেই পদকটোও তেওঁৰ পৰা কাঢ়ি লোৱা হৈছে আৰু সকলো মল্লযুঁজাৰুৰ শেষত তেওঁক স্থান দিয়া হৈছে।
ইয়াৰ পাছতেই বিনেশে ৭ আগষ্টৰ সন্ধিয়া CASত আবেদন জনায়, য’ত প্ৰথমে তেওঁ ফাইনেল স্থগিত ৰাখি আৰু এটা সুযোগ দিয়াৰ বাবে দাবী উত্থাপন কৰে। লগে লগে CASয়ে এই দাবী নাকচ কৰি কয় যে, তেওঁলোকে ফাইনেল স্থগিত ৰাখিব নোৱাৰে। পাছত বিনেশে আবেদন সলনি কৰি যৌথভাৱে ৰূপৰ পদক প্ৰদানৰ দাবী উত্থাপন কৰে।
এই আবেদনৰ ঠিক পাছতেই ২৯ বছৰীয়া বিনেশে মল্লযুঁজৰ পৰা অৱসৰ লোৱাৰ কথা ঘোষণা কৰি কয় যে, তেওঁৰ আৰু অধিক যুঁজিবলৈ শক্তি নাই। এনে পৰিস্থিতিত সমগ্ৰ দেশতেই হতাশা, দুখ আৰু ক্ষোভৰ পৰিবেশৰ সৃষ্টি হয়। আনকি সংসদতো এই বিষয়টো উত্থাপন কৰা হৈছিল। বিৰোধীয়েও এই বিষয়ত চৰকাৰৰ হস্তক্ষেপৰ দাবী জনাইছিল। ইফালে দেশৰ প্ৰধানমন্ত্ৰী নৰেন্দ্ৰ মোদীয়ে পেৰিছত উপস্থিত থকা ভাৰতীয় অলিম্পিক সন্থাৰ সভাপতি পি টি উষাৰ সৈতে এই বিষয় সন্দৰ্ভত আলোচনা কৰে।
