শ্ৰীলংকা ভ্ৰমণৰ অন্তত ক্ৰিকেটৰ পৰা কিছু দিনৰ বাবে বিৰতি লৈছে টিম ইণ্ডিয়াই। ১৯ ছেপ্টেম্বৰৰ পৰা পৰৱৰ্তী শৃংখলা খেলিব ভাৰতে। এই আজৰি সময়খিনিত সাম্প্ৰতিক সময়ৰ শ্ৰেষ্ঠ বেটাৰ বিৰাট কোহলীয়ে পঞ্জাৱবাসীক দিছে বিশেষ উপহাৰ।
কোহলীয়ে নিজৰ ৰেষ্টুৰেণ্টৰ ব্যৱসায় এইবাৰ সম্প্ৰসাৰণ কৰিছে পঞ্জাৱৰ মোহালীত। বিৰাটৰ এই পদক্ষেপৰ পিছতে বহু নিবনুৱা যুৱক-যুৱতীৰ বাবে নতুন নতুন চাকৰিৰ সুযোগ মুকলি হ’ব। ছ’চিয়েল মিডিয়াৰ জৰিয়তে বিৰাটে নিজৰ নতুন আউটলেট One8 Commune সম্পৰ্কে বিতং তথ্য প্ৰদান কৰিছে।
বিৰাট কোহলীয়ে মোহালীত মুকলি হোৱা One8 Commune ৰ নতুন আউটলেটৰ ভিডিঅ’ ইনষ্টাগ্ৰামৰ জৰিয়তে শ্বেয়াৰ কৰিছে। পোষ্টটোৰ কেপশ্যনত লিখিছে- মোহালী কোহলিং। তেওঁ পঞ্জাৱৰ জনসাধাৰণক ইয়াৰ বাবে সাজু নেকি বুলিও প্ৰশ্ন কৰিছে।
বিৰাট কোহলীৰ One8 Commune ৰ এইটো দশম আউটলেট। ইয়াৰ পূৰ্বে বিৰাট কোহলীৰ One8 Commune ৰ আউটলেট গুৰগাঁও, পুনে, দিল্লী, কলকাতা, বেংগালুৰু আদি চহৰত আছিল। অৰ্থাৎ ভাৰতৰ প্ৰায় প্ৰতিখন বৃহৎ চহৰতে তেওঁৰ আউটলেট আছে।
জানিব পৰা অনুসৰি, জ্যেষ্ঠ ভাতৃ বিকাশ কোহলীৰ সৈতে বিৰাটে এই ৰেষ্টুৰেণ্টৰ ব্যৱসায় চলাই আছে।
অভিনৱ ৰুচিৰ বাবে পৰিচিত ৮ ৰেষ্টুৰেণ্টৰ শেহতীয়া সংযোজন মোহালী। এই সন্দৰ্ভত বিৰাট কোহলীয়ে কয় যে তেওঁৰ হৃদয়ত মোহলীৰ বাবে এক বিশেষ স্থান আছে। তেওঁ কয় যে তেওঁৰ বাবে one8 Commune কেৱল খোৱা-বোৱাৰ ঠাই নহয় বৰঞ্চ মানুহে ইয়াত নিজৰ অনুভৱ ভাগ-বতৰা কৰাৰ লগতে নতুন বন্ধুত্বও গঢ়িব পাৰে।
মোহালীত বিৰাটৰ নতুন ৰেষ্টুৰেণ্টখন মুকলি হোৱাৰ পিছত স্পষ্ট হৈ পৰিছে যে এই ৰেষ্টুৰেণ্টৰ জৰিয়তে বহু লোক সংস্থাপিত হ’ব।
