ৰাজ্য জোকাৰি যোৱা এক ঘটনা সংঘটিত হৈছে অসম-মিজোৰাম সীমান্তৰ লায়লাপুৰত। লায়লাপুৰ ফেঞ্চনগৰত এগৰাকী অন্তঃসত্বা মহিলাৰ মৃত্যুক কেন্দ্ৰ কৰি সৃষ্টি হৈছে বহুকেইটা প্ৰশ্নৰ।
মহিলাগৰাকীৰ পৰিয়ালৰ ফালৰ অভিযোগ অনুসৰি, স্বামীৰ পৰিয়ালে পৰিকল্পিতভাৱে হত্যা কৰিছে মহিলাগৰাকীক। ইতিমধ্যে, ঘটনা সন্দৰ্ভত লায়লাপুৰ আৰক্ষী চকীত ৰুজু কৰা হৈছে গোচৰ।
জানিব পৰা মতে, মিনাৰা বেগম নামৰ মহিলাগৰাকীক স্বামীৰ লগতে পৰিয়ালৰ ৬ জন সদস্যই যৌতুকৰ বাবে নিৰ্যাতন চলাই আহিছে। প্ৰায় এবছৰ পূৰ্বে ফ্ৰেঞ্চনগৰৰ ৰিয়াজুল আলীৰ সৈতে বিবাহ-পাশত আৱদ্ধ হৈছিল মিনাৰা বেগমৰ। বিবাহৰ পিছৰে পৰাই স্বামীৰ পৰিয়ালে যৌতুকৰ বাবে নিৰ্যাতন চলাই আহিছে মিনাৰাক।
উল্লেখ্য যে, শুকুৰবাৰে শহুৰেকৰ ঘৰত মিনাৰা বেগম নামৰ মহিলাগৰাকীৰ ৰহস্যজনকভাৱে মৃত্যু হয়। খবৰ পাই পিতৃ পৰিয়ালৰ লোকসকল উপস্থিত হোৱাত স্বামীৰ পৰিয়ালৰ লোকে মিনাৰাই আত্মহত্যা কৰিছে বুলি দাবী কৰে।
পিছে এই কথা মানি ল’ব পৰা নাই মিনাৰাৰ পিতৃ পৰিয়ালৰ লোকসকলে। তেওঁলোকে মিনাৰাক হত্যা কৰা হৈছে বুলি সন্দেহ প্ৰকাশ কৰি খৱৰ দিয়ে আৰক্ষীক৷ আৰক্ষীক ঘটনাস্থলীত উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে শিলচৰ মেডিকেল কলেজলৈ প্ৰেৰণ কৰে।
ইপিনে মৃত বোৱাৰী গৰাকীৰ পৰিয়ালৰ অভিযোগ অনুসৰি, ১ বছৰ পূৰ্বে মিনাৰা বেগমৰ বিবাহ হৈছিল লায়লাপুৰ ফ্ৰেঞ্চনগৰৰ ৰিয়াজুল আলীৰ লগত। বৰ্তমান বোৱাৰী গৰাকী আছিল ৮ মাহৰ অন্তঃসত্ত্বা।
বিবাহৰ পিছৰে পৰা মিনাৰা বেগমক স্বামী ৰিয়াজুল সহ শহুৰেকৰ ঘৰৰ লোকসকলে যৌতুকৰ বাবে শাৰীৰিক-মানষিক নিৰ্যাতন চলাই আহিছিল।
এই বিষয়ক লৈ পূৰ্বেও বহু বিচাৰসভা অনুষ্ঠিত হৈছিল গাঁৱত। বৰ্তমান হত্যাৰ অভিযোগ তুলি স্বামী ৰিয়াজুল আলী সহ ছয়জনৰ বিৰুদ্ধে মৃত বোৱাৰী গৰাকীৰ মাতৃয়ে লায়লাপুৰ আৰক্ষী চকীত ৰুজু কৰিছে এক গোচৰ। ঘটনা সন্দৰ্ভত আৰক্ষীয়ে ৰুজু কৰিছে গোচৰ।
