দুখন ৰাজ্যত অনুষ্ঠিত হ’বলগীয়া বিধানসভা নিৰ্বাচনৰ দিন আজি ঘোষণা কৰাৰ সম্ভাৱনা আছে। জানিব পৰা অনুসৰি আজি বিয়লি নিৰ্বাচন আয়োগে সংবাদমেলৰ জৰিয়তে নিৰ্বাচনৰ দিন ঘোষণা কৰিব।
জম্মু-কাশ্মীৰ আৰু হাৰিয়ানাত অনুষ্ঠিত হ’বলগীয়া নিৰ্বাচনৰ বাবে ইতিমধ্যেই সকলো প্ৰস্তুতি সম্পন্ন কৰিছে নিৰ্বাচন আয়োগে। অৱশ্যে মহাৰাষ্ট্ৰ আৰু ঝাৰখণ্ড হ’বলগীয়া নিৰ্বাচনৰ দিন পৰৱৰ্তী পৰ্যায়ত ঘোষণা কৰিব বুলি জানিব পৰা গৈছে।
আজি এই দুখন ৰাজ্যত হ’বলগীয়া বিধানসভা নিৰ্বাচনৰ দিন ঘোষণা কৰাৰ সম্ভাৱনা আছে যদিও নিৰ্বাচন আয়োগে এই পৰ্যন্ত মহাৰাষ্ট্ৰ আৰু ঝাৰখণ্ড ভ্ৰমণ কৰা নাই। সেয়ে এই দুখন ৰাজ্যৰ নিৰ্বাচনৰ দিন আজিয়েই ঘোষণা কৰিব নে নাই সেয়া স্পষ্ট হোৱা নাই।
কেৱল বিধানসভা নিৰ্বাচনৰ দিনেই নহয় কেইবাখনো ৰাজ্যত হ’বলগীয়া বিধানসভা আৰু লোকসভাৰ উপ-নিৰ্বাচনৰো দিন ঘোষণা কৰাৰ সম্ভাৱনা আছে।
এই সকলোবোৰ বিষয় সামৰি নিৰ্বাচন আয়োগে আজি দুপৰীয়া তিনি বজাত এক সংবাদমেলৰ আয়োজন কৰিছে।
হাৰিয়ানা আৰু মহাৰাষ্ট্ৰৰ বিধানসভাৰ কাৰ্যকাল ৩ নৱেম্বৰ আৰু ২৬ নৱেম্বৰত অন্ত পৰিব। ৩০ ছেপ্টেম্বৰৰ পূৰ্বে জম্মু-কাশ্মীৰত বিধানসভা নিৰ্বাচন অনুষ্ঠিত কৰাৰ পৰিকল্পনাও কৰিছে নিৰ্বাচন আয়োগে। এই সময়সীমা নিৰ্ধাৰণ কৰিছে উচ্চতম ন্যায়ালয়ে।
শেহতীয়াকৈ আয়োগে নিৰ্বাচন সম্পৰ্কীয় প্ৰস্তুতিৰ বুজ ল’বলৈ জম্মু-কাশ্মীৰ আৰু হাৰিয়ানা ভ্ৰমণ কৰিছিল যদিও এইপৰ্যন্ত মহাৰাষ্ট্ৰ আৰু ঝাৰখণ্ড ভ্ৰমণ কৰা নাই।
উল্লেখ্য যে, জম্মু-কাশ্মীৰৰ পৰা ৩৭০ অনুচ্ছেদ আঁতৰোৱাৰ পিছত প্ৰথমবাৰৰ বাবে বিধানসভা নিৰ্বাচন অনুষ্ঠিত হ’ব।
