হাৰিয়ানা বিধানসভা নিৰ্বাচনৰ দিন ঘোষণাৰ লগে লগে ৰাজ্যখনত ৰাজনৈতিক দলসমূহে যুদ্ধ গতিত আৰম্ভ কৰিছে প্ৰস্তুতি। দলসমূহে নিৰ্বাচনী ৰণ জিনাৰ বাবে পৰিকল্পনা যুগুত কৰি থকাৰ সমান্তৰালকৈ নিৰ্বাচনী সমীক্ষাৰ ফলাফলো আহিবলৈ আৰম্ভ কৰিছে।
এটা ৰাষ্ট্ৰীয় টেলিভিচনত প্ৰকাশ পোৱা অ’পিনিয়ন প’লৰ সমীক্ষাত হাৰিয়ানাৰ সকলো ৰাজনৈতিক দলেই যেন সংখ্যাগৰিষ্ঠতাৰ পৰা বহু দূৰত। ৰাজ্যখনত বিজেপি পুনৰ সৰ্ববৃহৎ দল হিচাপে আত্মপ্ৰকাশ কৰিছে। আম আদমি পাৰ্টিয়েও নিজৰ খোপনি পুতিবলৈ সক্ষম হৈছে।
আনহাতে বিজয়ৰ দাবী কৰা কংগ্ৰেছৰ পৰিস্থিতি ৰাজ্যখনত খুউব এটা সন্তোষজনক নহয়।
অ’পিনিয়ন প’লৰ সমীক্ষা অনুসৰি, হাৰিয়ানা বিধানসভা নিৰ্বাচনত বিজেপি নেতৃত্বাধীন এন ডি এ-ই ৩৪ৰ পৰা ৩৯খন আসন লাভ কৰিব। ইফালে কংগ্ৰেছক দিছে ২৯ৰ পৰা ৩৪ খন আসন।
আনহাতে অৰবিন্দ কেজৰিৱাল নেতৃত্বাধীন আম আদমি পাৰ্টিক প্ৰদান কৰা হৈছে ৮ৰ পৰা ১৩খন আসন। ইয়াৰ উপৰি ইণ্ডিয়ান নেচনেল লোকদল আৰু বহুজন সমাজ পাৰ্টিকো কিছু আসন প্ৰদান কৰিছে।
উল্লেখ্যে যে, ৯০ খন আসন বিশিষ্ট হাৰিয়ানাত ২০১৯ চনত অনুষ্ঠিত বিধানসভা নিৰ্বাচনত বিজেপিয়ে ৪০ খন আসন আৰু কংগ্ৰেছ দলে ৩১ খন আসনত জয়লাভ কৰিছিল।
চৰকাৰ বনাবলৈ মেজিক নম্বৰ লাভ নকৰাত বিজেপিয়ে ১০ খন আসনত জয় লাভ কৰা জেজেপিৰ সৈতে মিত্ৰতা কৰি চৰকাৰ গঠন কৰিছিল।
২০১৯ চনত অনুষ্ঠিত হোৱা নিৰ্বাচনত বিজেপিয়ে ৩৬.৪৯ শতাংশ আৰু কংগ্ৰেছ দলে ২৮.০৬ শতাংশ ভোট লাভ কৰিছিল।
