বিশ্বৰ অন্যতম শ্ৰেষ্ঠ ফুটবলাৰ ক্ৰিষ্টিয়ানো ৰোনাল্ডোৱে ফুটবল কেৰিয়াৰৰ মাজতে সামাজিক মাধ্যমৰ প্লেটফৰ্মটো জনপ্ৰিয়তাৰ শীৰ্ষত। ফুটবল খেলত দুটা দশক ধৰি সকলোৰে সমাদৰ লাভ কৰিবলৈ সক্ষম হোৱা তাৰকাগৰাকীয়ে এইবাৰ সামাজিক মাধ্যমত জোকাৰণিৰ সৃষ্টি কৰিছে।
ৰোনাল্ডোৱে ‘ইউআৰ ক্রিষ্টিয়ানো’ নামৰ এটা ইউটিউব চেনেল মুকলি কৰে। ইউটিউব চেনেলটো মুকলি কৰাৰ কথা ঘোষণাৰ পিছতে প্ৰথম দুঘণ্টাৰ ভিতৰতে ৰোনাল্ডোৱে ইউটিউবৰ নামত থকা ‘বিশ্ব অভিলেখ’ ভংগ কৰিবলৈ সক্ষম হয়।
ফুটবল তাৰকাগৰাকীয়ে ইউটিউব প্লেটফৰ্মৰ ইতিহাসত ২৪ ঘণ্টাৰ ভিতৰতে ১কোটি গ্ৰাহকক আকৃষ্ট কৰিবলৈ সক্ষম হয়। ৰোনাল্ডোৰ ইউটিউব একাউণ্টৰ চাবস্ক্ৰাইবাৰৰ সংখ্যাই এক কোটি অতিক্ৰম কৰা পিছতে তেওঁৰ নামত সংযোজন হয় এই বিশ্ব অভিলেখ।
ইতিমধ্যে সমগ্ৰ ছ’চিয়েল মিডিয়া প্লেটফৰ্মত সৰ্বাধিক অনুৰাগীয়ে অনুসৰণ কৰা ব্যক্তিৰ ভিতৰত আছে ৰোনাল্ডো। এক্স (পূৰ্বৰ টুইটাৰ)ত তেওঁৰ ১১২.৫ মিলিয়ন, ফেচবুকত ১৭ কোটি আৰু ইনষ্টাগ্ৰামত ৬৩.৬ কোটি অনুৰাগী আছে।
বুধবাৰে নিজৰ নতুন যাত্ৰা আৰম্ভ কৰাৰ কথা ঘোষণা কৰি ৰোনাল্ডোৱে নিজৰ ছ’চিয়েল মিডিয়া একাউণ্টত পোষ্ট কৰি কয় যে, “অৱশেষত মোৰ @YouTube চেনেলটো আহিল! Subscribe কৰক আৰু মোৰ সৈতে এই নতুন যাত্ৰাত যোগদান কৰক।”
ৰোনাল্ডোৱে চেনেলটোৰ মুকলি দিনটো ভিডিঅ’ৰে উদযাপন কৰে, য’ত আছিল টিজাৰ ট্ৰেইলাৰ, তেওঁৰ সংগী জৰ্জিনা ৰড্ৰিগেজৰ সৈতে এটা কুইজ গেম। চেনেলটোত পৰ্তুগীজ ফুটবলাৰগৰাকীয়ে মেডাম টুছ’ডছত নিজৰ মোমৰ ফিগাৰ লগ পোৱাৰ এটা ক্লিপও প্ৰকাশ পাইছিল।
উল্লেখ্য যে ইউটিউব একাউণ্ট খোলাৰ পিছত এক কোটিৰ সীমা অতিক্ৰম কৰাৰ অভিলেখ পূৰ্বে হামষ্টাৰ কম্বেটৰ হাতত আছিল, চেনেলটোৱে এই মাইলৰ খুঁটিত উপনীত হ’বলৈ ৭ দিন সময় লৈছিল। ইতিমধ্যে ৰোনাল্ডোৰ চেনেলটোৱে ২ঘণ্টাৰ ভিতৰতে ২ বিলিয়ন ছাবস্ক্ৰাইবাৰৰ সীমা অতিক্ৰম কৰে, যিটো পূৰ্বতে কোনো চেনেলে এই কৃতিত্ব অৰ্জন কৰিব পৰা নাছিল।
বৰ্তমান ছৌদি আৰৱৰ ক্লাব আল-নাছৰৰ হৈ খেলা এই প্ৰবীণ ষ্ট্ৰাইকাৰগৰাকীয়ে আগন্তুক দিনত ইউটিউবত আৰু কেইবাটাও অভিলেখ ভংগ কৰা সম্ভাৱনা আছে।
