পাকিস্তানৰ বিৰুদ্ধে ঐতিহাসিক বিজয় সাব্যস্ত কৰাৰ পিছত বাংলাদেশ দলটোৱে দুটাকৈ মোক্ষম আঘাতৰ সন্মুখীন হ’বলগীয়া হৈছে। ৰাৱালপিণ্ডিত খেলা প্ৰথমখন টেষ্টত লেহেমীয়া অভাৰৰেটৰ বাবে পাকিস্তানৰ ৬ পইণ্ট আৰু বাংলাদেশৰ ৩ পইণ্ট কৰ্তন কৰা হয়।
পইণ্ট কৰ্তনৰ সমান্তৰালকৈ এইবাৰ আইচিচিৰ ৰোষত পৰিছে বাংলাদেশৰ অলৰাউণ্ডাৰ ছাকিব আল হাছান। পাকিস্তানৰ বিৰুদ্ধে ৰাৱালপিণ্ডি টেষ্টৰ সময়ত আইচিচিৰ আচৰণ বিধি লেভেল ১ ভংগ কৰাৰ বাবে ছাকিব আল হাছানক মেচ মাচুলৰ ১০% জৰিমনা আৰু এটা ডেমেৰিট পইণ্ট দিয়া হৈছে।
মেচ ৰেফাৰী ৰঞ্জন মাডুগালে ৰায় দিয়ে যে ছাকিবে আইচিচিৰ আচৰণ বিধিৰ ২.৯ অনুচ্ছেদ উলংঘা কৰিছে, য’ত ‘আন্তঃৰাষ্ট্ৰীয় মেচৰ সময়ত খেলুৱৈ, খেলুৱৈৰ সহায়ক কৰ্মচাৰী, আম্পায়াৰ, মেচ ৰেফাৰী বা আন কোনো তৃতীয় ব্যক্তিৰ ওচৰত বা তেওঁৰ ওচৰত অনুপযুক্ত আচৰণ’ /বা ইয়াৰ সৈতে জড়িত বিপদজনকভাৱে বল নিক্ষেপ কৰালৈকে।
ছাকিবে নিজৰ ভুল মানি লোৱাৰ লগতে মাডুগালে দিয়া শাস্তিও মানি লৈছে। সেয়ে আনুষ্ঠানিক শুনানিৰ প্ৰয়োজন নাছিল।
উল্লেখ্য যে, পাকিস্তানৰ বেটাৰ মহম্মদ ৰিজৱানে বেটিং কৰি থকাৰ সময়ত ছাকিবে তেওঁলৈ বল নিক্ষেপ কৰা কাৰ্যৰ বিৰুদ্ধে অন-ফিল্ড আম্পায়াৰ কেটলব’ৰ’ আৰু এড্ৰিয়ান হোল্ডষ্টক, তৃতীয় আম্পায়াৰ মাইকেল গফ আৰু চতুৰ্থ আম্পায়াৰ ৰছিদ ৰিয়াজে ছাকিবৰ বিৰুদ্ধে অভিযোগ উত্থাপন কৰিছে।
ইফালে শেহতীয়াকৈ হাছানৰ বিৰুদ্ধে হত্যাৰ অভিযোগ উত্থাপন হোৱাৰ লগতে এই সম্বন্ধত ঢাকাত এফআইআৰ ৰুজু হৈছে। স্মৰ্তব্য যে, বাংলাদেশত সংৰক্ষণৰ বিৰোধিতাৰে আৰম্ভ হোৱা ছাত্ৰ আন্দোলনৰ সময়ত এজন ছাত্ৰই প্ৰাণ হেৰুৱাইছিল আৰু সেই ছাত্ৰজনৰ মৃত্যুত ছাকিব আল হাছান জড়িত থকাৰ অভিযোগ তুলি এজাহাৰ দাখিল কৰা হৈছে। কেৱল ক্ৰিকেটাৰগৰাকীয়ে নহয় এই মৃত্যুৰ গোচৰত আন কেইবাজনো লোকৰ বিৰুদ্ধে এজাহাৰত নাম উল্লেখ আছে।
