হাৰিয়ানাৰ ৰোহটকত সংঘটিত হৈছে এক ভয়ংকৰ ঘটনা। বৃহস্পতিবাৰে নিশা ৰোহটকৰ শোণিপত ৰোডস্থিত এখন সুৰা বিপণীত হোৱা ভয়ংকৰ গুলীচালনাত তিনিজন যুৱকৰ মৃত্যু হোৱাৰ লগতে আন দুজন যুৱক গুৰুতৰভাৱে আহত হোৱাৰ খবৰ আহিছে।
জানিব পৰা অনুসৰি, সুৰাৰ ঘাটিত বহি থকা পাঁচজন যুৱকক মটৰ চাইকেলেৰে অহা এটা দুৰ্বৃত্তৰ দলে নিৰ্বিচাৰভাৱে গুলীচালনা কৰে। ঘটনা সংঘটিত কৰিয়েই দুৰ্বৃত্তৰ দলটো ঘটনাস্থলৰ পৰা পলায়ন কৰে।
তথ্য পোৱাৰ লগে লগে স্থানীয় আৰক্ষী থানাৰ এটা দল সেই স্থানত উপস্থিত হৈ তদন্ত আৰম্ভ কৰে। আৰক্ষীৰ প্ৰাথমিক তদন্ত অনুসৰি দুটা গেঙৰ মাজত থকা শত্ৰুতাৰ ফলতেই এই ঘটনা সংঘটিত হৈছে।
অৱশ্যে এই ঘটনা সন্দৰ্ভত আৰক্ষীয়ে বিতং তথ্য প্ৰকাশ কৰা নাই যদিও দুৰ্বৃত্তৰ দলটোক চিনাক্ত কৰিবলৈ ক্ষীপ্ৰগতিত তদন্ত চলাই আছে বুলি জানিব দিয়ে।
