ড্ৰাগছৰ বিৰুদ্ধে কঠোৰ স্থিতি গ্ৰহণ কৰি থকাৰ সময়তে এইবাৰ কামৰূপৰ আমিনগাঁৱত বৃহৎ পৰিমাণৰ ড্ৰাগছ জব্দ কৰা হৈছে। মিজোৰামৰ কেম্পাইৰ পৰা বৰপেটালৈ সৰবৰাহৰ সময়তে এই বৃহৎ পৰিমানৰ ড্ৰাগছখিনি জব্দ কৰে আৰক্ষীয়ে।
এই নিচাজাতীয় সামগ্ৰীখিনিৰ লগতে আৰক্ষীয়ে দুজন ড্ৰাগছ সৰবৰাহকাৰী মফিজ উদ্দিন আৰু লালচান বাদছাক গ্ৰেপ্তাৰ কৰে।
AS 28 AC 1042 নম্বৰৰ এখন ট্ৰাকৰে নিচাজাতীয় সামগ্ৰী কঢ়িয়াই নি থকা অৱস্থাত স্পেচিয়েল টাস্ক ফ’ৰ্চ (STF) ৰ অভিযানত এই বৃহৎ পৰিমাণৰ ড্ৰাগছখিনি জব্দ কৰা বুলি জানিব পৰা গৈছে।
কামৰূপৰ অতিৰিক্ত আৰক্ষী অধীক্ষক কল্যাণ পাঠকৰ নেতৃত্বত চলা এই অভিযানত জব্দ কৰা ড্ৰাগছখিনিৰ বজাৰ মূল্য প্ৰায় ৪ কোটি টকা বুলি জানিব দিয়ে অভিযানকাৰী আৰক্ষীৰ দলটোৱে।
ট্ৰাকৰ হুডত লুকুৱাই আনিছিল এই বৃহৎ পৰিমানৰ ড্ৰাগছখিনি।
