বৰপেটাত সংঘটিত হৈছে এক চাঞ্চল্যকৰ ঘটনা। বৰপেটা অসামৰিক চিকিৎসালয়ৰ বিৰুদ্ধে সদ্যোজাত সন্তান এটি সলনি কৰাৰ ভয়ংকৰ অভিযোগ উত্থাপিত হৈছে।
উল্লেখ্য যে, ২২ ছেপ্তেম্বৰত এগৰাকী প্ৰসূতিয়ে বৰপেটা অসামৰিক চিকিৎসালয়ত এটি ল’ৰা সন্তানৰ জন্ম দিয়ে। পিছে জন্মৰ কিছুসময়ৰ পিছতেই অসুস্থ হৈ পৰে সন্তানটি। বৰপেটা অসামৰিক চিকিৎসালয়ৰ পৰা বৰপেটা ফকৰুদ্দিন আলী আহমেদ মেডিকেল কলেজ হস্পিটেললৈ প্ৰেৰণ কৰা হয় সন্তানটিক।
কিন্তু চিকিৎসালয়ত ভৰ্তি কৰিবৰ বাবে বৰপেটা অসামৰিক চিকিৎসালয়ৰ এগৰাকী নাৰ্ছে প্ৰস্তুত কৰি দিয়ে নথি-পত্ৰ।সেই নথি-পত্ৰলৈ প্ৰসূতি গৰাকীৰ পৰিয়ালে শিশুটিক লৈ উপস্থিত হয় মেডিকেল কলেজত।
কিন্তু ইয়াৰ পিছতেই পৰিয়ালৰ মাজত লাগে হৈ-চৈ। কিয়নো চিকিৎসালয়ৰ নথি-পত্ৰত ল’ৰাৰ পৰিবৰ্তে কন্যাসন্তান বুলিহে উল্লেখ আছিল।যাৰ বাবে অসুস্থ শিশুটিক মেডিকেল কলেজখনত ভৰ্তি নকৰায়। ফলত বিনা চিকিৎসাই শিশুটিৰ মৃত্যু হোৱাৰ অভিযোগ তোলে পৰিয়ালৰ লোকে।
ইফালে ল’ৰা সন্তানটি সলনি কৰি অসুস্থ কন্যা সন্তান গতাই দিয়া বুলি বৰপেটা অসামৰিক চিকিৎসালয়ৰ বিৰুদ্ধে এই গুৰুতৰ অভিযোগ উত্থাপন কৰাৰ লগতে কলগাছিয়া থানাত এজাহাৰ দাখিল কৰে ভুক্তভোগী পৰিয়ালটোৱে।
আনহাতে প্ৰসূতি গৰাকীয়ে কন্যা সন্তানহে জন্ম দিছে বুলি চিকিৎসালয় কৰ্তৃপক্ষই জানিবলৈ দিয়াৰ লগতে এইয়া সামান্য ভুল বুলিহে মন্তব্য কৰিছে চিকিৎসালয়খনৰ অধীক্ষকগৰাকীয়ে। সম্প্ৰতি এই ঘটনাই তীব্ৰ চাঞ্চল্যৰ সৃষ্টি কৰিছে।