দুচকুত সপোন আৰু গভীৰ আত্মবিশ্বাস থাকিলে সকলো সম্ভৱ। এই বাক্যশাৰীকেই প্ৰমাণ কৰি দেখুৱালে নলবাৰী জিলাৰ চাৰিগৰাকী কিশোৰীয়ে। ১৯ বছৰ অনূৰ্ধ্বৰ অসম মহিলা ক্ৰিকেট দলত নলবাৰীৰ চাৰিগৰাকী প্ৰতিভাৱান ক্ৰিকেটাৰে স্থান লাভ কৰিছে।
অসম ক্ৰিকেট দলত স্থান লাভ কৰা ক্ৰিকেটাৰ কেইগৰাকী হৈছে প্ৰাঙ্গনা বৈশ্য, জাগৃতি কলিতা, কাকু বৰ্মন আৰু জ্ঞানশ্ৰী বৰ্মন। প্ৰাঙ্গনা বৈশ্য আৰু জাগৃতি কলিতা চৰকাৰী গৰ্ডন উচ্চতৰ মাধ্যমিক বিদ্যালয়ৰ ছাত্ৰী। আনহাতে কাকু বৰ্মন আৰু জ্ঞানশ্ৰী বৰ্মন দেৱীৰাম পাঠশালা উচ্চতৰ মাধ্যমিক বিদ্যালয়ৰ ছাত্ৰী।
নলবাৰীৰ গৰ্ডন ক্ৰিকেট একাডেমীত প্ৰশিক্ষণ প্ৰাপ্ত চাৰিগৰাকী ছাত্ৰীয়ে ১৯ অনূৰ্ধ্বৰ অসম মহিলা ক্ৰিকেট দলটোত স্থান লাভৰ পিছতে উৎফুল্লিত হৈ পৰিছে ক্ৰিকেট একাডেমীখনৰ প্ৰশিক্ষকসকল।
উল্লেখযোগ্য যে নলবাৰীৰ পৰা অসম দলত স্থান লাভ কৰা খেলুৱৈ সকলক লৈ যথেষ্ট আশাবাদী প্ৰশিক্ষক মহেশ্বৰ হালৈ আৰু গৰ্ডন ক্ৰিকেট একাডেমী। অনাগত দিনত ভাৰতীয় দলত স্থান লাভৰ কামনা কৰে প্ৰশিক্ষক গৰাকীয়ে।
অহা ১ অক্টোবৰৰ পৰা নাগপুৰত হ’বলগীয়া ২০২৪-২৫ বৰ্ষৰ বি চি চি আই মহিলাৰ অনূৰ্ধ্ব-টি-২০ টুৰ্ণামেণ্টত অংশ ল’ব নলবাৰীৰ গৌৰৱ এই চাৰিগৰাকী কন্যাই। স্মৰ্তব্য যে, অসম ক্ৰিকেট সন্থাই এই প্ৰতিযোগিতাখনৰ প্ৰথম দুখন মেচৰ বাবে এই দলটো ঘোষণা কৰিছে।
