শেহতীয়া দিনবোৰত বেংক লেনদেনত জালিয়াতি, ভুৱা নথিপত্ৰৰ জৰিয়তে প্ৰৱঞ্চনা, আৰু অন্যান্য বিত্তীয় কেলেংকাৰীৰে জড়িচ বিভিন্নধৰণৰ ঘটনা পোহৰলৈ আহিছে। অৱশ্যে, ছত্তীশগড়ৰ এই শেহতীয়া ঘটনাক বৰ্তমানলৈকে নথিভুক্ত হোৱা আটাইতকৈ দুঃসাহসিক কাণ্ডবোৰৰ ভিতৰত এটা হিচাপে গণ্য কৰা হৈছে।
চিনেমা এখনৰ পোনপটীয়া এক ষড়যন্ত্ৰৰ দৰে, অপৰাধীসকলে অতি সতৰ্কতাৰে এক বৃহৎ বেঙ্কিং প্ৰৱঞ্চনাৰ পৰিকল্পনা কৰাৰ লগতে ইয়াক কাৰ্যকৰীয়ো কৰে। যাৰ ফলত ভাৰতীয় ষ্টেট বেংকৰ (এছবিআই) এটা ভুৱা শাখা সৃষ্টি হয়।
এই কেলেংকাৰীটোত অবৈধ নিযুক্তি, ভুৱা প্ৰশিক্ষণ অধিৱেশন, নিবনুৱা নিযুক্তি আৰু স্থানীয় গাওঁবাসীকে ধৰি সকলোকে প্ৰৱঞ্চনা কৰাৰ এক বিস্তৃত ছেটআপ অন্তৰ্ভুক্ত হৈ আছিল।
ছত্তীশগড়ৰ ৰাজধানী ৰায়পুৰৰ পৰা প্ৰায় ২৫০ কিলোমিটাৰ দূৰত্বত, সাকতি জিলাৰ ছাপোৰা নামৰ এখন গাঁৱত, দেশৰ সৰ্ববৃহৎ বেংক এছ.বি.আই.-ত বৈধ চাকৰি বুলি ৬ জন ব্যক্তিক নিয়োগ কৰা হৈছিল।
মাত্ৰ ১০ দিন পূৰ্বে মুকলি হোৱা শাখাটোত এটা প্ৰকৃত বেংকৰ দৰে সকলো উপাদানেই আছিল, যেনে- নতুন আচবাব, পেছাদাৰী কাগজপত্ৰ, আৰু কাৰ্যকৰী বেংক কাউণ্টাৰ।
চলিত কেলেংকাৰীৰ বিষয়ে অজ্ঞাত গাওঁবাসীয়ে একাউণ্ট খুলিবলৈ আৰু লেনদেন কৰিবলৈ এই বেংকলৈ যাবলৈ আৰম্ভ কৰে। নতুনকৈ নিয়োগ কৰা কৰ্মচাৰীসকলেও এটা প্ৰতিষ্ঠিত বেংকত চাকৰি সুৰক্ষিত কৰিব পাই অতিশয় আনন্দিত হয়।
ওচৰৰ দাব্ৰা শাখাৰ মেনেজাৰে সন্দেহ প্ৰকাশ কৰাৰ পিছত ২৭ ছেপ্টেম্বৰত আৰক্ষী আৰু এছবিআইৰ শীৰ্ষ বিষয়াসকলে বেংকত জেৰাৰ বাবে উপস্থিত নোহোৱা পৰ্যন্ত সকলোবোৰ স্বাভাৱিকেই দেখা গৈছিল। কিন্তু আৰক্ষী উপস্থিত হোৱাতহে আচল উৰহি গছৰ ওৰটো ওলায়। তাত আৰক্ষীয়ে এইটো আৱিষ্কাৰ কৰে যে, ছপোৰাৰ এই শাখাটো ভুৱা আৰু ইয়াত প্ৰদান কৰা নিযুক্তিবোৰো ভুৱা।
দাব্ৰা শাখাৰ মেনেজাৰে ছপোৰাত চলি থকা এই ভুৱা বেংকসম্পৰ্কে তেওঁৰ সন্দেহৰ বিষয়ে অৱগত কৰিছিল। অনুসন্ধানৰ পিছত, এইটো নিশ্চিত কৰা হৈছিল যে এই বেংকটো ভুৱা, আৰু ইয়াত কেইবাজনো কৰ্মচাৰীক নকল নথিপত্ৰৰ সৈতে নিযুক্তি দিয়া হৈছিল বুলি জ্যেষ্ঠ আৰক্ষী বিষয়া ৰাজেশ পেটেলে জানিবলৈ দিয়ে।
উল্লেখ্য যে, বৰ্তমানলৈকে এই কেলেংকাৰীটোত জড়িত ৪ গৰাকী লোকক চিনাক্ত কৰিছে। এই ভুৱা শাখাটোৱে সকলো নিযুক্তিপ্ৰাপ্ত লোকক প্ৰশিক্ষণো প্ৰদান কৰিছিল। অৱশ্যে, কেলেংকাৰীটোৰ আঁৰৰ মাষ্টাৰমাইণ্ডজনে নিবনুৱাসকলৰ পৰা অত্যাধিক মাচুল দাবী কৰিছিল, তাৰ বিনিময়ত তেওঁলোকক লাভজনক চৰকাৰী চাকৰিৰ প্ৰতিশ্ৰুতি দিছিল।এই নিযুক্তিৰ বিনিময়ত নৱ-নিযুক্ত কৰ্মচাৰীসকলে নিজৰ পদ সুৰক্ষিত কৰিবলৈ ২ লাখৰ পৰা ৬ লাখ টকা পৰিশোধ কৰিছিল।
অজয় কুমাৰ আগৰৱালা নামৰ এজন স্থানীয় গাওঁবাসীয়ে ছপোৰাত এছ.বি.আই.-ত চাকৰিৰ বাবে আবেদন কৰিছিল। যেতিয়া তেওঁ আৱিষ্কাৰ কৰিলে যে এছ.বি.আই. শাখা এটা হঠাতে ৰাতিটোৰ ভিতৰতে স্থাপন হৈছে, তেতিয়া তেওঁৰ মনত এই বিষয়ক লৈ সন্দেহ ঘণীভূত হয়।
ইয়াৰ উপৰি এই বেংকৰ ছাইনবোৰ্ডতো কোনো শাখা কোড তালিকাভুক্ত কৰা হোৱা নাছিল। অজয়ৰ সন্দেহ আৰু তাৰ পিছত দাব্ৰা শাখাৰ মেনেজাৰক দিয়া প্ৰতিবেদনৰ ফলতেই এই কেলেংকাৰীটো পোহৰলৈ আহে।
