অসমৰ এক জলন্ত সমস্যা বিদেশী সমস্যা। এই বিদেশীৰ যাতনা ভোগা এটা ডেকা ল’ৰাৰ কাহিনীৰে অহা ২৫ অক্টোবৰ তাৰিখে অসমৰ ছবিগৃহ সমূহত মুক্তি পাব অসমীয়া চিনেমা ‘সুন্দৰপুৰ কেঅছ’।
আজি পাঞ্জবাৰীস্থিত শংকৰদেৱ কলাক্ষেত্ৰৰ সন্মুখত চিনেমাখনৰ কিছু শিল্পী, কলা-কুশলী লৈ পৰিচালক ঝুলন কৃষ্ণ মহন্তই অসমৰ মাটি আৰু সত্ৰ বেদখলৰ বিৰুদ্ধে মাত মাতি এটি সমদল উলিয়ায়।
পৰিচালক মহন্তই অসমৰ সংবাদ মাধ্যম তথা মাননীয় মুখ্যমন্ত্ৰী ড° হিমন্ত বিশ্ব শৰ্মা প্ৰমুখ্যে সকলো ৰাজনৈতিক দল-সংগঠনক এই বিশেষ বিষয়টোৰ ওপৰত নিৰ্মিত চিনেমাখন চাবলৈ আহ্বান জনায়।
“কাঁটা তাঁৰ আৰু ইয়াৰ বিপক্ষে মাত মাতিবলৈ সময়ে সময়ে বহু ডেকাই তেজ দিলে। সেই তেজক সাক্ষী কৰি বহু মানুহ নেতা হ’ল আৰু বহু নেতা হেৰাইয়ো গ’ল। কিন্তু সমস্যা এতিয়াও থাকি গ’ল। এতিয়া আমাৰ মাত-কথা, খেতিৰ মাতি আনে কাঢ়িলে বুলি আমি কান্দোঁ। কিন্তু আমাৰ ডেকাই মনে মনে বহি থাকে বুলি মাজে মাজে বদনাম ওলায়, কিন্তু আমাৰ মানুহ মনে মনে আছেনে ?”, এইদৰে কয় পৰিচালকগৰাকীয়ে।
উল্লেখ্য যে, এই ছবিখনত গীতিকাৰ মঞ্জুলা হাজৰিকাই লিখা এটি গীতত বলিউদৰ জনপ্ৰিয় গায়ক ছানে কণ্ঠদান কৰিছে। লগতে অসমৰ পাপন আৰু গায়ত্ৰী হাজৰিকাই কণ্ঠ দিয়া এই ছবিখনত অভিনয় কৰিছে অৰুন নাথ, ৰাজীৱ গোস্বামী, জ্বলি লস্কৰ, গাৰ্গী দত্ত, বনী দেউৰী প্ৰমুখ্যে বহু অভিনেতা-অভিনেত্ৰীয়ে।
মুখ্য ভুমিকাত আছে লক্ষীমপুৰৰ নাৰায়ণপুৰৰ অভিনেতা তথা দিল্লীৰ ৰাষ্ট্ৰীয় নাট্য বিদ্যালয়ৰ স্নাতক পাৰ্থ প্ৰতিম হাজৰিকাই। ছবি খনৰ কাহিনী চিত্ৰনাট্য আৰু সম্পাদনা ঝুলন কৃষ্ণ মহন্তৰ। চিনেমাখনৰ প্ৰযোজনা আৰ চি প্ৰডাকচনৰ।
