১৫ আগষ্টৰ পূৰ্বে ৰদ বদল তথা সম্প্ৰসাৰণ হ’ব হিমন্ত বিশ্ব শৰ্মা মন্ত্ৰীসভাৰ। লোকসভা নিৰ্বাচনৰ ফলাফল ঘোষণাৰ পিছতেই মন্ত্ৰীসভাৰ সম্প্ৰসাৰণ তথা ৰদ বদলৰ ইংগিত দিছিল মুখ্যমন্ত্ৰী ড০ হিমন্ত বিশ্ব শৰ্মাই। এইবাৰৰ মন্ত্ৰীসভাত নতুন মুখে স্থান পাব বুলি কৰা ঘোষণাৰ পিছতেই চৰ্চাত আহিছে বিজেপি দলৰ কেইবাজনো শীৰ্ষ নেতাৰ নাম।
বৰ্তমানৰ বিজেপি অধ্যক্ষ ভৱেশ কলিতা, লোকসভাৰ প্ৰাক্তন সাংসদ পল্লৱ লোচন দাসৰ সমান্তৰালকৈ এইবাৰ চৰ্চালৈ আহিছে বড়ো ৰাজনীতিৰ অন্যতম চিনাকি মুখ বিশ্বজিৎ দৈমাৰীৰ নাম।
ৰাজ্যসভাৰ লগতে বিধানসভাৰ আসন শুৱনি কৰি অহা দৈমাৰীৰ জৰিয়তে বড়ো অধ্যুষিত বিটিচিৰ শাসনভাৰ দখলৰ ব্লুপ্ৰিণ্ট ৰচিছে বিজেপিয়ে। আগন্তুক বিচিটি নিৰ্বাচনত ইউপিপিএল-বিপিএফক সাৰথি কৰি শাসনভাৰ দখল কৰিব বিচৰা নাই বিজেপিয়ে। যাৰ বাবে বিজেপিয়ে বিশ্বজিত দৈমাৰীক মন্ত্ৰিত্ব প্ৰদান কৰি বিটিএডিত দলটোৰ সাংগঠনিক ভেটি মজবুট কৰাৰ পৰিকল্পনা যুগুত কৰিছে।
যদিহে বিশ্বজিৎ দৈমাৰীয়ে মন্ত্ৰিত্ব লাভ কৰে তেন্তে তেওঁ এৰিব লাগিব বিধানসভাৰ অধ্যক্ষৰ পদ।
অধ্যক্ষ পদত কাক অধিষ্ঠিত কৰাব তাক লৈও নিখুট পৰিকল্পনা কৰিছে বিজেপিয়ে। বিজেপিৰ ভিতৰচ’ৰাৰ খবৰ অনুসৰি অধ্যক্ষ পদৰ বাবে বাছনি কৰা হৈছে বৰ্তমানৰ মন্ত্ৰীসভাৰ বন বিভাগৰ দৰে গুৰুত্বপূৰ্ণ দপ্তৰৰ দায়িত্বত থকা চন্দ্ৰমোহন পাটোৱাৰীৰ নাম।
ধৰ্মপুৰৰ পৰা কেইবাবাৰো বিধানসভালৈ নিৰ্বাচিত হৈ অহা চন্দ্ৰমোহন পাটোৱাৰীক মন্ত্ৰী পদৰ পৰা আঁতৰাই বিধানসভাৰ অধ্যক্ষ পদত অধিষ্ঠিত কৰোৱাটো প্ৰায় নিশ্চিত হৈ পৰিছে।
