আমেৰিকাৰ সৰ্ববৃহৎ তদন্তকাৰী সংস্থা এফ বি আইয়ে প্ৰাক্তন ভাৰতীয় বিষয়া বিকাশ যাদৱক খালিস্তানী সন্ত্ৰাসবাদী গুৰপতৱন্ত সিং পান্নুক হত্যাৰ ষড়যন্ত্ৰ কৰাৰ অভিযোগত ম’ষ্ট ৱাণ্টেড ঘোষণা কৰিছে।
দৰাচলতে আমেৰিকাৰ মাটিত গুৰপতৱন্ত সিং পান্নুক হত্যা কৰাৰ ব্যৰ্থ ষড়যন্ত্ৰত বিকাশ যাদৱৰ ভূমিকা থকাৰ অভিযোগ উত্থাপন কৰিছে এফ বি আইয়ে।
উল্লেখ্য যে, যোৱা বছৰ প্ৰধানমন্ত্ৰী নৰেন্দ্ৰ মোদীৰ আমেৰিকা ভ্ৰমণৰ সময়ত আমেৰিকা প্ৰশাসনে পান্নুক হত্যাৰ ষড়যন্ত্ৰ ৰচনা কৰা বুলি দাবী কৰিছে।
আমেৰিকাৰ আইন বিভাগে ৩৯ বছৰীয়া বিকাশ যাদৱৰ বিৰুদ্ধে উত্থাপিত অপৰাধমূলক অভিযোগৰ বিষয়ে সংবাদ মাধ্যমক অৱগত কৰি ভাৰতৰ বিদেশী চোৰাংচোৱা সেৱা, ৰিচাৰ্চ এণ্ড এনালাইছিছ উইং (ৰ)ৰ প্ৰাক্তন কৰ্মচাৰী বুলি অভিহিত কৰে।
ইফালে আমেৰিকাৰ এই দাবীৰ বিপৰীতে নতুন দিল্লীস্থ বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে এই সমগ্ৰ বিষয়ত কয় যে বিকাশ যাদৱ এতিয়া ভাৰত চৰকাৰৰ কৰ্মচাৰী নহয়।
তথ্য অনুসৰি বিকাশ যাদৱ মূলতঃ হাৰিয়ানাৰ। হাৰিয়ানাতে শিক্ষা গ্ৰহণ কৰিছিল বিকাশ যাদৱে। খালিস্তান সমৰ্থক নেতা গুৰপতৱন্ত সিং পান্নুৰ হত্যাৰ ষড়যন্ত্ৰ আৰু তাৰ বাবে ধনৰ ব্যৱস্থা কৰাৰ অভিযোগ। বিকাশ যাদৱ কেন্দ্ৰীয় সংৰক্ষিত আৰক্ষী বাহিনী (চি আৰ পি এফ)ত কৰ্মৰত আছিল।
