প্ৰধানমন্ত্ৰী নৰেন্দ্ৰ মোদীয়ে ব্ৰিকছ শীৰ্ষ সন্মিলনৰ বাবে ৰাছিয়ালৈ যোৱাৰ পূৰ্বেই ভাৰতে এক বৃহৎ সফলতা লাভ কৰে। ভাৰত আৰু চীনৰ মাজত পূব লাডাখত LACৰ ওপৰত চলি থকা ষ্টেণ্ডঅফৰ সমাধানৰ পথ এতিয়া যেন স্পষ্ট হৈ পৰিছে।
ৰাছিয়াৰ কাজানত অনুষ্ঠিত হ’বলগীয়া ব্ৰিকছ সন্মিলনত অংশগ্ৰহণৰ বাবে ৰাওনা হ’বলৈ ওলাইছে প্ৰধানমন্ত্ৰী মোদী। প্ৰধানমন্ত্ৰী মোদীৰ ৰাছিয়া ভ্ৰমণৰ পূৰ্বে বৈদেশিক সচিবগৰাকীয়ে সংবাদমেলত কয় যে, প্ৰকৃত নিয়ন্ত্ৰণ ৰেখা অৰ্থাৎ LACত টহল দিয়াৰ ক্ষেত্ৰত ভাৰত আৰু চীনৰ মাজত চুক্তি হৈছে।
এই চুক্তিৰ পিছত LAC ৰ সৈন্য প্ৰত্যাহাৰৰ পথ মুকলি কৰা হ’ব আৰু তাৰ পিছত এই সমস্যা সমাধানৰ পথ মুকলি কৰা হ’ব।
সোমবাৰে এখন সংবাদমেলত বৈদেশিক সচিব বিক্ৰম মিশ্ৰীয়ে কয় যে, ৰাছিয়াৰ ৰাষ্ট্ৰপতি ভ্লাদিমিৰ পুটিনৰ আমন্ত্ৰণত ১৬ সংখ্যক ব্ৰিকছ সন্মিলনত অংশগ্ৰহণৰ বাবে কাইলৈ প্ৰধানমন্ত্ৰী মোদীয়ে কাজানলৈ ৰাওনা হ’ব। ব্ৰিকছত ভাৰতৰ গুৰুত্ব অতিশয় বেছি আৰু অৰ্থনৈতিক বৃদ্ধি, বহনক্ষম উন্নয়ন আৰু বিশ্ব শাসন সংস্কাৰৰ দৰে ক্ষেত্ৰত ব্ৰিকছৰ প্ৰচেষ্টাক গঢ় দিয়াত ইয়াৰ অৱদান গুৰুত্বপূৰ্ণ ভূমিকা পালন কৰিছে।
