ঝাৰখণ্ডৰ বৰহীৰ প্ৰাক্তন কংগ্ৰেছ নেতা তথা বিধায়ক উমাশংকৰ আকেলাক ২ কোটি টকাৰ বিনিময়ত টিকট দিয়াৰ অভিযোগ উত্থাপন সন্দৰ্ভত প্ৰতিক্ৰিয়া প্ৰকাশ কৰে অসমৰ মুখ্যমন্ত্ৰী হিমন্ত বিশ্ব শৰ্মাই।
শুকুৰবাৰে শৰ্মাই কয় যে মইও এটা সময়ত কংগ্ৰেছত আছিলো। কংগ্ৰেছত যদি এখন ৰাজ্যত ১০০ খন আসন থাকে তেন্তে ২০ খন আসন বিক্ৰী হয়। এয়া কংগ্ৰেছৰ পুৰণি পৰম্পৰা।
শৰ্মাই লগতে কয় যে উমা শংকৰ আকেলাই কোৱা কথাবোৰ নতুন কথা নহয়। প্ৰতিখন ৰাজ্যতে আমি দেখিবলৈ পাওঁ যে কংগ্ৰেছে ২০ শতাংশ আসন বিক্ৰী কৰে। মীৰ চাহেবৰ বিৰুদ্ধে কোনো ব্যক্তিগত অভিযোগ উত্থাপন কৰি লাভ নাই। এয়া কংগ্ৰেছৰ ব্যৱস্থা যে তেওঁলোকে ২০ শতাংশ আসন বিক্ৰী কৰে।
ৰাঁচীত বিদ্ৰোহী প্ৰাৰ্থী সন্দৰ্ভত সোধা প্ৰশ্নৰ উত্তৰত তেওঁ কয় যে নিৰ্বাচনত প্ৰতিদ্বন্দ্বিতা কৰাটো সকলোৱে বিচাৰে আৰু মনোনয়ন প্ৰত্যাহাৰৰ সময়লৈকে তেওঁলোকক সৈমান কৰা হয়।
তেওঁ লগতে কয় যে বিজেপি নেতৃত্বাধীন এন ডি এয়ে প্ৰতিখন আসনত এজনকৈ প্ৰাৰ্থী প্ৰক্ষেপ কৰিছে যদিও ইণ্ডি মিত্ৰজোঁটৰ অৱস্থা চাওক। ইণ্ডি মিত্ৰজোঁটৰ আসনৰ বাবে দুই-তিনিজন প্ৰাৰ্থীয়ে প্ৰতিদ্বন্দ্বিতা কৰিছে বুলিও তেওঁ কয়।
এন ডি এৰ সকলো মিত্ৰশক্তিক শুভেচ্ছা জ্ঞাপন কৰি তেওঁ সুদেশ মহটোৱে পুনৰবাৰ চিল্লী বিধানসভা সমষ্টিৰ পৰা অভিলেখ ভোটৰে জয়ী হ’ব বুলি আশা প্ৰকাশ কৰে।
লগতে কয় যে ঝাৰখণ্ডত এন ডি এৰ জয় নিশ্চিত। ঝাৰখণ্ডত গঠন হ’ব এন ডি এ চৰকাৰ। প্রতিশ্রুতি অনুসৰি চৰকাৰ গঠনৰ পাছত খোদ প্রথম কেবিনেট বৈঠকতে ঝাৰখণ্ডৰ ছোৱালী-মহিলাৰ একাউণ্টত প্রতিমাহে ২১০০ টকা গগ’ দিদী আঁচনিৰ অধীনত দিয়া হ’ব বুলিও তেওঁ কয়৷ এবছৰত ১.৫ লাখ চাকৰিৰ ব্যৱস্থা কৰিব।
হিমন্ত বিশ্ব শৰ্মাই কয় যে অনুপ্ৰৱেশকাৰীৰ পৰা ঝাৰখণ্ডক বচাব লাগিব। অসমৰ অৱস্থাও একেধৰণৰ আছিল। মুছলমানৰ সংখ্যা ২০ শতাংশ বৃদ্ধি পোৱাৰ লগে লগে অনুপ্ৰৱেশকাৰীৰ সংখ্যা ৪৫ শতাংশলৈ বৃদ্ধি পালে। বাংলাদেশী অনুপ্ৰৱেশকাৰীৰ বাবে ঝাৰখণ্ডৰ জনগাঁথনি সলনি হৈছে যদিও শাসকীয় জেএমএম এই বিষয়ত নিমাত। কাৰণ, তেওঁলোক তেওঁলোকৰ ভোট বেংক। ঝাৰখণ্ডতো অসমৰ দৰে একে পৰিস্থিতি হ’ব।
