পোনপটীয়াকৈ নক’লেও মহেন্দ্ৰ সিং ধোনীয়ে পৰৱৰ্তী আই পি এলত খেলিবলৈ সন্মত হৈছে। শুকুৰবাৰে এক অনুষ্ঠানত ধোনীয়ে কৰা মন্তব্যৰ পিছতে তেওঁৰ অনুৰাগী তথা চেন্নাই শিবিৰত আনন্দৰ জোৱাৰ উঠা পৰিলক্ষিত হৈছে।
ৰাষ্ট্ৰীয় সংবাদ মাধ্যমে প্ৰকাশ কৰা বাতৰি অনুসৰি আগন্তুক ছিজনৰ বাবে চেন্নাই দলে কোনকেইজন ক্ৰিকেটাৰক ৰিটেইন কৰিব তাৰ তালিকা নিজেই প্ৰস্তুত কৰি আছে ধোনীয়ে।
এই খবৰৰ পিছতে ক্ৰিকেট অনুৰাগীসকলৰ মনত প্ৰশ্নৰ উদয় হৈছে যে অধিনায়ক ৰুতুৰাজ গাইকৱাদ বা ৰবীন্দ্ৰ জাদেজাক প্ৰথম পছন্দ হিচাপে ৰিটেইন কৰা হ’ব নেকি?
উল্লেখ্য যে, বিগত সময়ত চেন্নাইক নেতৃত্ব দিয়াত ব্যৰ্থ হৈছিল জাদেজা। যোৱা ছিজনত ধোনীয়ে নিজেই ৰুতুৰাজক উত্তৰাধিকাৰী হিচাপে বাছি লৈ নেতৃত্বৰ দায়িত্ব তেওঁৰ হাতত অৰ্পণ কৰিছিল। সেয়ে ৰুতুৰাজক ৰিটেইন কৰাৰ সম্ভাৱনা আছে।
ইফালে ধোনীয়ে জাদেজাক প্ৰথম পছন্দ হিচাপে ৰাখিব বিচাৰে। অৰ্থাৎ যদি এয়া হয় তেন্তে জাদেজাই বছৰি ১৮ কোটি টকা লাভ পাব। ৰুতুৰাজক দ্বিতীয় পছন্দ হিচাপে যদি ৰিটেইন কৰে তেন্তে তেওঁ পাব ১৪ কোটি টকা।
আনহাতে তৃতীয় পছন্দৰ ক্ৰিকেটাৰ হ’ব পাৰে শ্ৰীলংকাৰ বেগী বলাৰ পাথিৰানা। চেন্নাইৰ হৈ উজ্জিৱীত প্ৰদৰ্শন কৰিয়েই তেওঁ আন্তঃৰাষ্ট্ৰীয় মঞ্চত পৰিচিত হৈছিল। ধোনীৰো প্ৰিয় পাথিৰানা। যদি তেওঁক তৃতীয় পছন্দ হিচাপে ৰিটেন কৰা হয় তেন্তে তেওঁ পাব ১১ কোটি টকা।
ধোনী নিজেই ‘আনকেপড’ ক্ৰিকেটাৰ হিচাপে দলত থাকিব বিচাৰে। যদি এয়া হয় তেন্তে তেওঁ বছৰত ৪ কোটি টকা পাব। চতুৰ্থ আৰু পঞ্চম পছন্দ হিচাপে তিনিটা নাম জল্পনা-কল্পনাৰ মাজত আছে। শিৱম ডুবে, ডেভন কনৱে আৰু সমীৰ ৰিজৱীৰ যিকোনো দুজনক দলে ৰিটেইন কৰাৰ সম্ভাৱনা আছে।
উল্লেখ্য যে, সম্প্ৰতি ধোনী আছে গোৱাত। দুই তিনিদিন পিছত ৰাঁচীলৈ উভতি আহিব। ইয়াৰ পিছত তেওঁ হয়তো চেন্নাইৰ স্বত্তাধিকাৰী এন শ্ৰীনিবাসনৰ সৈতে ফোনযোগে কথা পাতি ৰিটেইনড ক্ৰিকেটাৰৰ তালিকা নিশ্চিত কৰিব।
