সোমবাৰে অৰ্থাৎ ২৮ অক্টোৱৰত গুজৰাটৰ বদোদৰাত অৱস্থিত লক্ষ্মী বিলাস পেলেচত ভাৰত আৰু স্পেইনৰ মাজত প্ৰতিনিধি পৰ্যায়ৰ বৈঠক অনুষ্ঠিত হয়।
প্ৰধানমন্ত্ৰী মোদী আৰু স্পেইনৰ ৰাষ্ট্ৰপতি পেড্ৰ’ ছানচেজে দ্বিপাক্ষিক আলোচনাত প্ৰতিৰক্ষা আৰু অৰ্থনৈতিক সহযোগিতাৰ বিষয়ে আলোচনা কৰে। লগতে পশ্চিম এছিয়াৰ বৰ্তমানৰ নিৰাপত্তা পৰিস্থিতিক লৈও গভীৰ উদ্বেগ প্ৰকাশ কৰে। লগতে দুয়োখন দেশৰ ৰাষ্ট্ৰপতিসকলে এই সন্দৰ্ভত সকলো পক্ষৰ পৰা সংযমৰ আহ্বান জনায়।
ইজৰাইলত সংঘটিত সন্ত্ৰাসবাদী আক্ৰমণক তেওঁলোকে গৰিহণা দিয়াৰ কথা প্ৰকাশ কৰিছে বৈদেশিক মন্ত্ৰালয়ে। একে সময়তে গাজাত অসামৰিক জীৱনৰ বৃহৎ পৰিসৰৰ ক্ষতি আৰু মানৱীয় সংকটক গ্ৰহণযোগ্য নহয় বুলি অভিহিত কৰা হৈছে।
গাজাৰ মানৱীয় সংকটৰ অতি সোনকালে অন্ত পেলাব লাগে বুলিও প্ৰধানমন্ত্ৰী মোদী আৰু ৰাষ্ট্ৰপতি ছানচেজে একমত প্ৰকাশ কৰে। গুজৰাটৰ বদোদৰাৰ লক্ষ্মী বিলাস পেলেচত দুয়োগৰাকী নেতাৰ মাজত প্ৰতিনিধি পৰ্যায়ৰ বৈঠকৰ পিছতে এক যৌথ বিবৃতি প্ৰকাশ কৰে।
দ্বিপাক্ষিক আলোচনাত প্ৰধানমন্ত্ৰী মোদী আৰু ছানচেজে প্ৰতিৰক্ষা আৰু অৰ্থনৈতিক সহযোগিতাৰ বিষয়ে আলোচনা কৰে। লগতে সাংস্কৃতিক আৰু জনসাধাৰণৰ মাজত সম্পৰ্কৰ প্ৰয়োজনীয়তাৰ ওপৰত গুৰুত্ব আৰোপ কৰে।
এই যৌথ বিবৃতিত কোৱা হৈছে যে, ছানচেজৰ এই ভ্ৰমণে দ্বিপাক্ষিক সম্পৰ্কক এক নতুন গতি প্ৰদান কৰিছে। ই তেওঁলোকৰ বাবে নতুন গতি কঢ়িয়াই আনিছে আৰু দুয়োখন দেশৰ মাজত বিভিন্ন ক্ষেত্ৰত সহযোগিতাৰ এক নতুন যুগৰ ভেটি স্থাপন কৰিছে।
প্ৰধানমন্ত্ৰী মোদী আৰু ৰাষ্ট্ৰপতি ছানচেজেও দুয়োখন দেশৰ মাজত এই দ্বিপাক্ষিক বাণিজ্য আৰু বিনিয়োগৰ অংশীদায়িত্বৰ শেহতীয়া ইতিবাচক পৰিঘটনাক আদৰণি জনায়। লগতে দুয়োখন দেশৰ ব্যৱসায়িক প্ৰতিষ্ঠানৰ মাজত অধিক সুদৃঢ় সম্পৰ্ক স্থাপনৰ আহ্বান জনায়। ইয়াৰ পূৰ্বে দুয়োজন নেতাই টাটা এয়াৰক্ৰাফ্ট কমপ্লেক্স উদ্বোধন কৰে।
বদোদৰাৰ টাটা এয়াৰক্ৰাফ্ট কমপ্লেক্স হৈছে- ভাৰতৰ প্ৰথমটো ব্যক্তিগত ইউনিট, যিয়ে সামৰিক বিমান নিৰ্মাণ কৰে, য’ত চি ২৯৫ বিমান নিৰ্মাণ কৰা হ’ব। ২০১৭ চনত প্ৰধানমন্ত্ৰী মোদীৰ স্পেইন ভ্ৰমণৰ পিছত দ্বিপাক্ষিক সম্পৰ্কৰ অগ্ৰগতিৰ ওপৰত তেওঁ সন্তুষ্টি প্ৰকাশ কৰে।
তেওঁ নিজৰ দলটোক দ্বিপাক্ষিক কাৰ্যসূচীত আগবঢ়াই নিবলৈ আৰু ৰাজনৈতিক, অৰ্থনৈতিক, নিৰাপত্তা, প্ৰতিৰক্ষা আৰু অন্যান্য ক্ষেত্ৰত সহযোগিতা বৃদ্ধি কৰিবলৈও নিৰ্দেশ দিয়ে।
প্ৰধানমন্ত্ৰী মোদী আৰু ৰাষ্ট্ৰপতি ছানচেজে এই কথা আলোকপাত কৰে যে, ক্ৰমবৰ্ধমান অংশীদায়িত্বৰ ভেটি গণতন্ত্ৰ, স্বাধীনতা, আইনৰ শাসন আৰু সমতাপূৰ্ণ বিশ্ব অৰ্থনীতি, নিয়মভিত্তিক আন্তঃৰাষ্ট্ৰীয় ব্যৱস্থাৰ প্ৰতি এক ভাগ-বতৰা দায়বদ্ধতাত নিহিত হৈ আছে।
ৰাষ্ট্ৰপতি ছানচেজে ভাৰতৰ প্ৰায় ২৩০ টা স্পেনিছ কোম্পানীৰ কাৰ্যকলাপৰ জৰিয়তে মেক ইন ইণ্ডিয়া পদক্ষেপৰ প্ৰতি স্পেইনৰ দায়বদ্ধতাক আলোকপাত কৰে।
