সোমবাৰে ঝাৰখণ্ডত বিধানসভা নিৰ্বাচন সন্দৰ্ভত দুখন সভাত ভাষণ দিব প্ৰধানমন্ত্ৰী নৰেন্দ্ৰ মোদীয়ে। চৈবাছা আৰু গড়োৱাত অনুষ্ঠিত হ’ব এই সমাৱেশ। ভাৰতীয় জনতা পাৰ্টিৰ এগৰাকী জ্যেষ্ঠ নেতাই কয় যে, দিনৰ প্ৰায় ১১ বজাত প্ৰধানমন্ত্ৰী মোদী বিহাৰৰ গয়া বিমানবন্দৰত উপস্থিত হ’ব আৰু গড়োৱাত থকা এখন সভাত ভাষণ দিবলৈ হেলিকপ্টাৰেৰে গড়োৱালৈ যাব।
তেওঁ কয় যে গড়োৱাৰ সভাৰ পিছত প্ৰধানমন্ত্ৰী ৰাঁচীলৈ যাব আৰু তাৰ পৰা তেওঁ চৈবাছালৈ যাব, য’ত তেওঁ দুপৰীয়া প্ৰায় ২.৩০ বজাত আন এক সমাৱেশত ভাষণ দিব। ১৩ নৱেম্বৰ আৰু ২০ নৱেম্বৰত অনুষ্ঠিত হ’ব ঝাৰখণ্ড বিধানসভা নিৰ্বাচনৰ ভোটগ্ৰহণ আৰু ২৩ নৱেম্বৰত ভোটগণনা হ’ব।
প্ৰধানমন্ত্ৰী মোডীৰ ঝাৰখণ্ড ভ্ৰমণ সন্দৰ্ভত কেন্দ্ৰীয় কৃষি মন্ত্ৰী তথা ঝাৰখণ্ডৰ নিৰ্বাচন প্ৰভাৰী শিৱৰাজ সিং চৌহানে প্ৰধানমন্ত্ৰীৰ ভ্ৰমণৰ সকলো ব্যৱস্থা কৰা হৈছে বুলি কয়। ইফালে কেন্দ্ৰীয় গৃহমন্ত্ৰী অমিত শ্বাহে দেওবাৰে তিনিখন ৰাজনৈতিক সভা অনুষ্ঠিত কৰি বিজেপিৰ নিৰ্বাচনী ইস্তাহাৰ প্ৰকাশ কৰে।
ভোট বেংকৰ ৰাজনীতিৰ বাবে বাংলাদেশী অনুপ্ৰৱেশকাৰীক সুৰক্ষা দিয়াৰ অভিযোগ উত্থাপন কৰি কেন্দ্ৰীয় গৃহমন্ত্ৰী অমিত শ্বাহে দেওবাৰে ঝাৰখণ্ডত জেএমএম নেতৃত্বাধীন চৰকাৰখনৰ ওপৰত তীব্ৰ আক্ৰমণ চলায়। ৰাজ্যত যদি তেওঁৰ দল ক্ষমতালৈ আহে তেন্তে অবৈধ অনুপ্ৰৱেশকাৰীক জনজাতীয় ভূমি হস্তান্তৰ ৰোধৰ বাবে কঠোৰ আইন আনিব বুলিও তেওঁ কয়।
লগতে অমিত শ্বাহে ঘোষণা কৰে যে ২০২৬ চনৰ মাৰ্চ মাহৰ ভিতৰত দেশৰ পৰা নক্সালবাদ নিৰ্মূল হ’ব আৰু জনজাতীয় জনসাধাৰণৰ ওপৰত কোনো প্ৰভাৱ নপৰাকৈ ঝাৰখণ্ডত ইউনিফৰ্ম চিভিল কোড (ইউচিচি) কাৰ্যকৰী কৰা হ’ব। পূব সিংভূম জিলাৰ ঘাটছিলাৰ ধলভুমগড়ত বিজেপিৰ সভাত ভাষণ দি অমিত শ্বাহে দাবী কৰে যে, ৰাজ্যখনত জনজাতীয় জনসংখ্যা হ্ৰাস পাইছে কাৰণ হেমন্ত ছোৰেণ চৰকাৰে বাংলাদেশী অনুপ্ৰৱেশকাৰীক নিজৰ ভোট বেংক হিচাপে গণ্য কৰে।
