দীৰ্ঘসময় ধৰি ভাৰতীয় টেষ্ট দলৰ গুৰুত্বপূৰ্ণ অংশ হিচাপে থকা উইকেটকীপাৰ-বেটছমেন ৰিদ্ধিমান সাহাই সকলো ধৰণৰ ক্ৰিকেটৰ পৰাই অৱসৰ লোৱাৰ কথা ঘোষণা কৰিছে। বৰ্তমান সাহাই নিজৰ গৃহ ৰাজ্য বংগৰ হৈ ৰঞ্জী ট্ৰফী খেলি আছে।
চলিত ৰঞ্জী ট্ৰফী ছিজন তেওঁৰ শেষ ছিজন হ’ব আৰু ইয়াৰ পিছত তেওঁ খেলৰ পৰা বিদায় ল’ব বুলি ছ’চিয়েল মিডিয়াত এটা পোষ্ট লিখি এই তথ্য দিলে সাহাই।
বিৰাট কোহলীৰ অধিনায়কত্বত ২০১৮-১৯ বৰ্ষত প্ৰথমবাৰৰ বাবে ঘৰুৱা টেষ্ট শৃংখলাত অষ্ট্ৰেলিয়াক পৰাস্ত কৰা দলটোৰ অংশ আছিল সাহা। ইয়াৰ পৰাই সাহাৰ কেৰিয়াৰ তললৈ নামি যায়।
সাহাই তেওঁৰ পোষ্টত কৈছে যে, এই যাত্ৰাত তেওঁক সহায় কৰা সেই সকলো লোককে তেওঁ কৃতজ্ঞতা জ্ঞাপন কৰিছে। সাহাই লিখিছে যে, ক্ৰিকেটৰ এক সুন্দৰ যাত্ৰাৰ অন্তত চলিত ছিজনটো তেওঁৰ শেষ ছিজন হ’ব। শেষবাৰৰ বাবে বংগক প্ৰতিনিধিত্ব কৰি তেওঁ সন্মানিত অনুভৱ কৰিছে। অৱসৰৰ পূৰ্বে এইখনেই হ’ব মোৰ অন্তিমখন ৰঞ্জী ট্ৰফী খেল।
টেষ্টত ভাৰতৰ হৈ সৰ্বাধিক শতক অৰ্জন কৰাৰ ক্ষেত্ৰত সাহা দ্বিতীয় স্থানত আছে। সাহাই ভাৰতৰ হৈ মুঠ ৪০খন টেষ্ট মেচ খেলি ২৯.৪১ গড়ে ১৩৫৩ ৰান সংগ্ৰহ কৰে, য’ত তিনিটা শতক আৰু ৬টা অৰ্ধশতক অন্তৰ্ভুক্ত কৰা হয়। এদিনীয়াত তেওঁ ভাৰতৰ হৈ ৯খন খেল খেলিছিল য’ত তেওঁ মাত্ৰ ৪১ ৰানহে কৰিছিল।
