ডাৰবানৰ কিংছমিড ক্ৰিকেট ষ্টেডিয়ামত ভাৰত আৰু দক্ষিণ আফ্ৰিকাৰ মাজত অনুষ্ঠিত হৈছে প্ৰথমখন টি-২০ মেচ। এই মেচখনৰ সময়ত পোহৰলৈ আহিছিল এক ডাঙৰ বিতৰ্ক। খেলখনৰ আৰম্ভণিতে ভাৰতীয় অনুৰাগীয়ে দক্ষিণ আফ্ৰিকাত ভাৰতীয় ৰাষ্ট্ৰীয় সংগীতক অপমান কৰা বুলি অভিযোগ উত্থাপন কৰিছে। এই ঘটনা সংঘটিত হৈছিল টছৰ পিছত।
উল্লেখ্য যে, ডাৰবানৰ কিংছমিড ক্ৰিকেট ষ্টেডিয়ামত আৰম্ভ হয় এই শৃংখলা। কিন্তু প্ৰথমখন মেচৰ আৰম্ভণিতে ঘটা এক ঘটনাই ছ’চিয়েল মিডিয়াত হুলস্থুলৰ সৃষ্টি কৰে। ভাৰতীয় অনুৰাগীয়ে দক্ষিণ আফ্ৰিকাই ভাৰতীয় ৰাষ্ট্ৰীয় সংগীতক অপমান কৰাৰ অভিযোগ উত্থাপন কৰিছে। ভাৰতীয় খেলুৱৈৰ সন্মুখত এই ঘটনা সংঘটিত হয়, যিয়ে সকলোকে আচৰিত কৰি তোলে।
এই খেলখনত দক্ষিণ আফ্ৰিকাৰ দলটোৱে টছত জয়লাভ কৰি প্ৰথমে বলিং কৰাৰ সিদ্ধান্ত লয়। টছৰ পিছত দুয়োটা দলে নিজ নিজ ৰাষ্ট্ৰীয় সংগীতৰ বাবে খেলপথাৰলৈ আহে। কিন্তু ভাৰতীয় ৰাষ্ট্ৰীয় সংগীত বজোৱাৰ সময়ত এটা অদ্ভুত ঘটনা দেখা গ’ল। আচলতে ভাৰতৰ ৰাষ্ট্ৰীয় সংগীতৰ সময়ত কাৰিকৰী ত্ৰুটিৰ বাবে দুবাৰকৈ ৰাষ্ট্ৰীয় সংগীত বন্ধ কৰিবলগীয়া হয়। এই ঘটনা দেখি কেৱল অনুৰাগীয়েই নহয় খেলুৱৈসকলো স্তম্ভিত হৈ পৰিল। অৱশ্যে এই সকলোবোৰৰ মাজতে ভাৰতৰ ৰাষ্ট্ৰীয় সংগীতটো সম্পূর্ণ হয় আৰু তাৰ পাছত মেচ আৰম্ভ হ’ল৷
এই ঘটনাৰ পিছত ভাৰতীয় ক্ৰিকেট অনুৰাগীসকলে ছ’চিয়েল মিডিয়াত ক্ষোভ প্ৰকাশ কৰি দক্ষিণ আফ্ৰিকা ক্ৰিকেট ব’ৰ্ডৰ দুৰ্বল পৰিচালনাক তীব্ৰ সমালোচনা কৰে। একাংশ অনুৰাগীয়ে ইয়াক টেকনিকেল সমস্যা বুলি অভিহিত কৰাৰ বিপৰীতে একাংশ অনুৰাগীয়ে ভাৰতৰ ৰাষ্ট্ৰীয় সংগীতক অপমান কৰা বুলি কয়। অৱশ্যে এই ঘটনাৰ পিছত সময়মতে খেলখন আৰম্ভ হোৱাত টীম ইণ্ডিয়াই আচৰিত ধৰণৰ বেটিং কৰা দেখা গ’ল।
এই মেচত টীম ইণ্ডিয়াই টছত পৰাস্ত হোৱাৰ পাছত প্ৰথমে বেটিং কৰি ব’ৰ্ডত এক ভাল স্ক’ৰ অৰ্জন কৰে। ভাৰতীয় দলটোৱে ২০ অভাৰত ৮টা উইকেট হেৰুৱাই ২০২ ৰান সংগ্ৰহ কৰে। এই ইনিংছত সৰ্বাধিক ৰান সংগ্ৰহ কৰা বেটছমেন আছিল সঞ্জু চেমছন। ৭টা চাৰি আৰু ১০টা ছয়ৰে তেওঁ ৫০টা বলত ১০৭ ৰান সংগ্ৰহ কৰে। আনহাতে, তিলক ভাৰ্মাই ১৮টা বলত ৩৩ ৰানৰ বৰঙণি আগবঢ়ায়। আনহাতে দক্ষিণ আফ্ৰিকাৰ হৈ জেৰাল্ড কোট্জীয়ে সৰ্বাধিক ৩টা উইকেট দখল কৰে। মাৰ্কো জেনছন, কেশৱ মহাৰাজ, নাকাবায়মজী পিটাৰ আৰু পেট্ৰিক আৰ্ল ক্ৰুগাৰে ১টাকৈ উইকেট দখল কৰে।
