ইতিহাস ৰচিলে এগৰাকী ভাৰতীয় বলাৰে। এইগৰাকী ভাৰতীয় বলাৰে এটা ইনিংছত ১০টা উইকেট দখল কৰি অনিল কুম্বলেৰ দৰে মহান ক্ৰিকেটাৰৰ অভিলেখ স্পৰ্শ কৰে। ৰঞ্জী ট্ৰফীৰ এখন মেচত কেৰালাৰ বিৰুদ্ধে ঐতিহাসিক প্ৰদৰ্শন আগবঢ়াই হাৰিয়ানাৰ বেগী বলাৰ অংশুল কাম্বোজে।
কেৰালাৰ বিৰুদ্ধে ৰঞ্জী ট্ৰফীৰ মেচখনত এক ইনিংছত ১০টা উইকেট দখল কৰাৰ কৃতিত্ব অৰ্জন কৰিছে অংশুল কম্বোজে। প্ৰথম শ্ৰেণীৰ ক্ৰিকেটত এই কৃতিত্ব অৰ্জন কৰা ষষ্ঠজন বলাৰ আৰু ৰঞ্জী ট্ৰফী ইতিহাসত তৃতীয়গৰাকী ভাৰতীয় বলাৰ হিচাপে পৰিগণিত হয়।
ইয়াৰ পূৰ্বে ৰঞ্জী ট্ৰফীত বংগৰ প্ৰেমাংগুছু চেটাৰ্জী (১৯৫৬-৫৭) আৰু ৰাজস্থানৰ প্ৰদীপ সুন্দৰমিনে (১৯৮৫-৮৬) এটা ইনিংছত ১০টা উইকেট দখল কৰিছিল। আনহাতে প্ৰথম শ্ৰেণীৰ ক্ৰিকেটত সুভাষ গুপ্তে (১৯৫৪-৫৫), অনিল কুম্বলে (১৯৯৮-৯৯) আৰু দেৱাশীষ মহান্তিয়ে (২০০০-০১) এটা ইনিংছত ১০টা উইকেট দখল কৰাৰ কৃতিত্ব অৰ্জন কৰিছে। আৰু আজি ৰঞ্জী ট্ৰফীৰ ইতিহাসত নিজৰ নাম পঞ্জীয়ন কৰে বেগী বলাৰ অংশুল কাম্বোজে।
ৰঞ্জী ট্ৰফীৰ যোৱা ৩৯ বছৰৰ ভিতৰত এটা ইনিংছত ১০টা উইকেট দখল কৰা প্ৰথমজন বলাৰ হিচাপেও পৰিগণিত হয় কাম্বোজ।
উল্লেখ্য যে, লাহলী ষ্টেডিয়ামত অনুষ্ঠিত ৰঞ্জী ট্ৰফীৰ মেচখনত ২৩ বছৰীয়া বেগী বলাৰ অংশুল কাম্বোজৰ বিধ্বংসী বলিঙত কেৰালাৰ বেটিং লাইন আপ বিধ্বস্ত হোৱা পৰিলক্ষিত হয়। ৪৯ ৰান খৰচ কৰি ১০টা উইকেট দখল কৰে অংশুল কাম্বোজে। অংশুলৰ আক্ৰমণাত্মক বলিঙৰ বাবেই কেৰালাই নিজৰ প্ৰথম ইনিংছ মাত্ৰ ২৯১ ৰানত সামৰে।
ৰঞ্জী ট্ৰফীৰ ইতিহাসৰ শ্ৰেষ্ঠ বলিং অভিলেখ
১০/২০ – প্ৰেমাংশু চেটাৰ্জী – বংগ বনাম অসম (১৯৫৬-৫৭)
১০/৪৯ – অংশুল কাম্বোজ – হাৰিয়ানা বনাম কেৰালা (২০২৪-২৫)
১০/৭৮ – প্ৰদীপ সুন্দৰাম – ৰাজস্থান বনাম বিদৰ্ভ (১৯৮৫-৮৬)
প্ৰথম শ্ৰেণীৰ ক্ৰিকেটত এটা ইনিংছত ১০টা উইকেট দখল কৰা ভাৰতীয় বলাৰ
১০/২০ – প্ৰেমাংশু চেটাৰ্জী – বংগ বনাম অসম (১৯৫৬-৫৭)
১০/৪৬ – দেৱাশীষ মহন্ত – পূব মণ্ডল বনাম দক্ষিণ মণ্ডল (২০০০-০১)
১০/৪৯ – অংশুল কাম্বোজ – হাৰিয়ানা বনাম কেৰালা (২০২৪-২৫)
১০/৭৪ – অনিল কুম্বলে – ভাৰত বনাম পাকিস্তান (১৯৯৯)
১০/৭৮ – প্ৰদীপ সুন্দৰাম – ৰাজস্থান বনাম বিদৰ্ভ (১৯৮৫-৮৬)
১০/৭৮ – সুভাষ গুপ্তে – বম্বে বনাম পাকিস্তান কম্বাইণ্ড চাৰ্ভিছেচ আৰু বাহাৱালপুৰ একাদশ (১৯৫৪-৫৫)
