হাৰিয়ানাৰ কেইবাখনো চহৰত ভয়াৱহ ৰূপ ধাৰণ কৰিছে বায়ু প্ৰদূষণে। বৰ্ধিত বায়ু প্ৰদূষণৰ প্ৰতি লক্ষ্য ৰাখি হাৰিয়ানা চৰকাৰে পঞ্চম শ্ৰেণীলৈকে সকলো বিদ্যালয় সাময়িকভাৱে বন্ধ ঘোষণা কৰিছে। এই সিদ্ধান্ত শিক্ষা সঞ্চালকালয়ে সকলো জিলাৰ উপ আয়ুক্তক নিৰ্দেশ দি গ্ৰহণ কৰিছে।
এই পদক্ষেপৰ লক্ষ্য হৈছে শিশুসকলক প্ৰদূষণৰ পৰা ৰক্ষা কৰা আৰু তেওঁলোকৰ স্বাস্থ্য সুৰক্ষা নিশ্চিত কৰা।
হাৰিয়ানাৰ ১২খন জিলাত সম্প্ৰতি ঘন কুঁৱলীয়ে আৱৰি ধৰিছে। পশ্চিম হাৰিয়ানাৰ ৰাজস্থানৰ ছিৰছা, ফতেহাবাদ আৰু হিছাৰ অঞ্চলত ভিজিবিলিটি ৫০ মিটাৰতকৈও কম। আনহাতে কুৰুক্ষেত্ৰ, কৈথাল, কৰ্ণাল, ৰেৱাৰী, ঝজ্জাৰ, গুৰুগ্ৰাম, ফৰিদাবাদ, ৰোহটক, ছোনিপট, পানীপট, জিন্দ আৰু চৰখী দাদ্ৰীত ভিজিবিলিটি ৫০ৰ পৰা ১০০ মিটাৰ।
বতৰ বিজ্ঞান বিভাগে ১৬ নৱেম্বৰলৈকে হাৰিয়ানাত কুঁৱলীৰ অৰেঞ্জ আৰু য়েল্ল’ সতৰ্কবাণী জাৰি কৰিছে। ৰাজ্যৰ ১১খন চহৰত সৰ্বোচ্চ AQI ৪০০ অতিক্ৰম কৰিছে।
হাৰিয়ানাত গ্ৰেডেড ৰেচপন্স চিষ্টেম (GRAP) ৰূপায়ণ কৰা হৈছে, য’ত AQI স্তৰৰ ওপৰত নিৰ্ভৰ কৰি বিভিন্ন বাধা আৰোপ কৰা হৈছে। যেতিয়া AQI ২০০ ৰ ওপৰলৈ যায় তেতিয়া GRAP ৰ প্ৰথম পৰ্যায় বলবৎ হয়। যদি ই ৩০০ অতিক্ৰম কৰে তেন্তে দ্বিতীয় পৰ্যায় কাৰ্যকৰী কৰা হয়।
আনহাতে, যেতিয়া AQI ৪০০ অতিক্ৰম কৰে, তেতিয়া GRAP-3 প্ৰযোজ্য হয়। বৰ্তমান হাৰিয়ানাত গ্ৰেপ-৩ কাৰ্যকৰী কৰা হৈছে, যাৰ অধীনত বহু নিষেধাজ্ঞা আৰোপ কৰা হৈছে।
