বুধবাৰে দক্ষিণ আমেৰিকাৰ গায়ানাত উপস্থিত হয় প্ৰধানমন্ত্ৰী নৰেন্দ্ৰ মোদী। বিগত ৫৬ বছৰৰ ভিতৰত প্ৰথমবাৰৰ বাবে কোনো ভাৰতীয় প্ৰধানমন্ত্ৰী গায়ানা ভ্ৰমণলৈ যায়। প্ৰধানমন্ত্ৰী নৰেন্দ্ৰ মোদী জৰ্জটাউনত উপস্থিত হোৱাৰ সময়ত ৰাষ্ট্ৰপতি ইৰফানে তেওঁক বিমানবন্দৰত সাৱটি ধৰি উষ্ম আদৰণি জনায়।ৰাষ্ট্ৰপতিৰ লগতে ১২জনৰো অধিক কেবিনেট মন্ত্ৰীয়েও প্ৰধানমন্ত্ৰীক আদৰণি জনায়।
গায়ানাৰ ৰাষ্ট্ৰপতিৰ সৈতে দ্বিপাক্ষিক বৈঠকত অংশগ্ৰহণ কৰাৰ উদ্দেশ্যে উপস্থিত হয় প্ৰধানমন্ত্ৰী মোদী। তেওঁ গায়ানা সংসদৰ বিশেষ বৈঠকতো ভাষণ দিব।
গায়ানাত থকা ভাৰতৰ ৰাষ্ট্ৰদূত অমিত এছ তেলাঙে প্ৰধানমন্ত্ৰীৰ ভ্ৰমণ সন্দৰ্ভত কয় যে, প্ৰধানমন্ত্ৰীৰ এই ভ্ৰমণ গায়ানা আৰু ভাৰত উভয়ৰে বাবে অতি গুৰুত্বপূৰ্ণ। তেওঁ কয় যে, বিগত ৫ দশক ভাৰতৰ প্ৰধানমন্ত্ৰী ভ্ৰমণৰ বাবে গায়ানালৈ আহিছে। দুয়োখন দেশৰ সম্পৰ্ক বছৰ বছৰ পুৰণি। ঐতিহাসিকভাৱেও ই অতি শক্তিশালী। তেওঁ কয় যে, প্ৰধানমন্ত্ৰীৰ গায়ানা ভ্ৰমণে দুয়োখন দেশৰ মাজত বছৰ বছৰ ধৰি বিদ্যমান গভীৰ বন্ধুত্ব দেখুৱাবলৈ যথেষ্ট।
তেওঁ কয় যে, গায়ানাত ভাৰতীয় সম্প্ৰদায়ৰ সংখ্যা বৃদ্ধি পাইছে। প্ৰধানমন্ত্ৰীৰ এই ভ্ৰমণক লৈ দুয়োখন দেশৰ লোক অতিশয় উৎসাহিত। তেওঁ কয় যে, প্ৰধানমন্ত্ৰী মোদীৰ গায়ানা ভ্ৰমণে দুয়োখন দেশৰ অংশীদাৰিত্বক এক নতুন জীৱন প্ৰদান কৰিব।
প্ৰধানমন্ত্ৰী মোদীক আদৰণি জনাই গায়ানা এক বৰ্ণিল কাৰ্যসূচীৰ আয়োজন কৰা হয়। প্ৰধানমন্ত্ৰীয়ে ভাৰতীয় সাজ-পোছাক পৰিধান কৰি সাংস্কৃতিক কাৰ্যসূচী উপভোগ কৰে।
CARICOM-India শীৰ্ষ সন্মিলনত অংশগ্ৰহণ
প্ৰধানমন্ত্ৰী মোদী দুদিনীয়া গায়ানা ভ্ৰমণত বৃহস্পতিবাৰে CARICOM-India শীৰ্ষক সন্মিলনত অংশগ্ৰহণ কৰিব। এই বৈঠকত তেওঁৰ সৈতে গ্ৰেনাডাৰ প্ৰধানমন্ত্ৰী ডিকন মিচেলও উপস্থিত থাকিব। এই সন্মিলনৰ উদ্দেশ্য হ’ব দেশৰ শক্তি, আন্তঃগাঁথনি, কৃষি, খাদ্য সুৰক্ষাৰ ওপৰত গুৰুত্ব দিয়া।
