আজিৰ পৰা আৰম্ভ হৈছে ব’ৰ্ডাৰ-গাভাস্কাৰ ট্ৰফীৰ প্ৰথমখন মেচ। পাৰ্থত চলি থকা প্ৰথমখন মেচত যশপ্ৰীত বুমৰাহৰ বলিং বিক্ৰমত একপ্ৰকাৰ দিশহাৰা হৈ পৰা দেখা যায় অষ্ট্ৰেলিয়া দলৰ বেটাৰসকলক।
বুমৰাহৰ আক্ৰমণাত্মক বলিঙৰ বাবেই থৰক-বৰক হৈ পৰে অষ্ট্ৰেলিয়া দলৰ প্ৰথম ইনিংছ। বুমৰাহৰ বলিঙত কেৱল তেওঁৰ অনুৰাগীয়ে নহয় বিশ্ব ক্ৰিকেটৰ প্ৰাক্তন ক্ৰিকেটাৰসকলো আপ্লুত হৈ পৰা দেখা যায়।
বুমৰাহৰ প্ৰদৰ্শনত আপ্লুত হৈ পাকিস্তানৰ প্ৰাক্তন বেগী বলাৰ ৱাছিম আক্ৰামে তেওঁক বিশ্বৰ আটাইতকৈ মহান বলাৰৰূপে আখ্যা দিয়ে। কমেণ্ট্ৰি কৰি থকাৰ সময়ত আক্ৰামে বুমৰাহক বিশ্বৰ আটাইতকৈ বিধ্বংসী বলাৰ বুলি কয়।
অষ্ট্ৰেলিয়াৰ প্ৰথম ইনিংছত যেতিয়া বুমৰাহে ষ্টিভ স্মিথক এল বি ডব্লিউৰ ৰূপত আউট কৰে তেতিয়া কমেণ্ট্ৰি কৰি থকা আক্ৰামে এই প্ৰতিক্ৰিয়া প্ৰকাশ কৰে। তেওঁ কমেণ্ট্ৰি বক্সৰ পৰাই চিঞঁৰি কয়, ‘বিশ্ব ক্ৰিকেটৰ আটাইতকৈ শ্ৰেষ্ঠ বলাৰ বুমৰাহ।’
ইফালে প্ৰথম দিনৰ খেলৰ অন্তত ৱাছিম আক্ৰমে কয়, ‘চাওক, মই বুমৰাহক শ্ৰেষ্ঠ বলাৰ বুলি গণ্য কৰো। তেওঁৰ ছুইং আৰু গতি আছে। আটাইতকৈ গুৰুত্বপূৰ্ণ কথাটো হ’ল তেওঁ সঠিক লাইন আৰু লেংথেৰে বলিং কৰে। তেওঁৰ বলৰ সন্মুখীন হোৱাটো বেটছেমনসকলৰ বাবে অত্যন্ত কঠিন। সেয়ে মই বুমৰাহক বিশ্বৰ শ্ৰেষ্ঠ বলাৰ বুলি গণ্য কৰো।’
উল্লেখ্য যে, পাৰ্থ টেষ্টৰ প্ৰথম দিনা প্ৰথমে বেট ধৰা ভাৰতে নিজৰ প্ৰথম ইনিংছ সামৰে মাত্ৰ ১৫০ ৰানত। ভাৰতৰ বেটিং প্ৰদৰ্শন ইমানেই শোচনীয় আছিল যে ১১ জন বেটাৰৰ ৬ জনেই স্পৰ্শ কৰিব নোৱাৰিলে দহকৰ ঘৰ। নিউজিলেণ্ড শৃংখলাৰ দৰে পুনৰ এবাৰ অসফল হ’ল বিৰাট কোহলী।
ইফালে ভাৰতক সীমিত স্ক’ৰতে সীমাবদ্ধ কৰিবলৈ সক্ষম হোৱা অষ্ট্ৰেলিয়া দলৰো প্ৰথম ইনিংছৰ আৰম্ভণি সুখকৰ নহ’ল। প্ৰথম টেষ্টত ভাৰতক নেতৃত্ব দিয়া বুমৰাহৰ বলিং আক্ৰমণত দিশহাৰা হৈ পৰে অষ্ট্ৰেলিয়াৰ বেটাৰ। দিনটোৰ অন্তত অষ্ট্ৰেলিয়াই ৭টা উইকেট হেৰুৱাই সংগ্ৰহ কৰে ৬৭ ৰান।
ভাৰতৰ হৈ বুমৰাহে চাৰিটা, ছিৰাজে দুটা আৰু হৰ্ষিত ৰানাই এটা উইকেট লাভ কৰে। ভাৰতে প্ৰথম ইনিংছত ৮৩ ৰানৰ অগ্ৰগতি লাভ কৰি আছে।
