মালয়েছিয়াৰ বিশিষ্ট ব্যৱসায়ী আনন্দ কৃষ্ণনৰ পুত্ৰ ৱেইন জান ছিৰিপানিয়োৱে পিতৃৰ অপৰিসীম ধন-সম্পত্তি আৰু গ্লেমাৰাছ জীৱন ত্যাগ কৰি বৌদ্ধ সন্ন্যাসী হোৱাৰ সিদ্ধান্তই সকলোকে আচৰিত কৰি তুলিছে।
উল্লেখ্য যে, আনন্দ কৃষ্ণন মালয়েছিয়াৰ তৃতীয় ধনী ব্যক্তি। তেওঁৰ সম্পত্তিৰ মূল্য ৪০ হাজাৰ কোটি টকাতকৈও অধিক (৫ বিলিয়ন ডলাৰতকৈও অধিক)।
তেওঁ আছিল পূৰ্বৰ টেলিকম কোম্পানী এয়াৰচেলৰ স্বত্বাধিকাৰী। এসময়ত আই পি এলৰ দল চেন্নাই ছুপাৰ কিংছক স্পনছৰ কৰিছিল এয়াৰচেলে।
টেলিকমৰ উপৰি চেটেলাইট, মিডিয়া, অইল, গেছ আৰু ৰিয়েল এষ্টেট খণ্ডতো বিস্তাৰিত হৈ আছে তেওঁৰ ব্যৱসায়। ৱেইন জান ছিৰিপানিয়োৰ মাতৃ এম সুপ্ৰিণ্ডা চক্ৰবানৰ থাইলেণ্ডৰ ৰাজপৰিয়ালৰ সৈতে পাৰিবাৰিক সম্পৰ্ক আছে।
উল্লেখ্য যে ৱেইন জান ছিৰিপানিয়োৱে ১৮ বছৰ বয়সত থাইলেণ্ডৰ মাতৃগৃহলৈ যোৱাৰ সময়ত প্ৰথমে বৌদ্ধ মঠত যোগদান কৰি সন্ন্যাসী হোৱাৰ সিদ্ধান্ত লৈছিল। সেই সময়ত তেওঁ কেৱল আধ্যাত্মিক অভিজ্ঞতাৰ বাবেই এই কাম কৰিছিল যদিও এতিয়া দুটা দশকৰ পাছত তেওঁ সম্পূৰ্ণৰূপে বৌদ্ধ সন্ন্যাসী হৈ নিজৰ বিলাসী জীৱন ত্যাগ কৰি অৰণ্যত অৱস্থিত বৌদ্ধ মঠত সন্ন্যাসীৰ দৰে জীয়াই আছে।
আন্তঃৰাষ্ট্ৰীয় সংবাদ মাধ্যমত প্ৰকাশ পোৱা তথ্য অনুসৰি, ৱেইন জান ছিৰিপানিয়োৱে তেওঁৰ শৈশৱ ব্ৰিটেইনত কটায়। দুগৰাকী ভগ্নীৰ সৈতে ব্ৰিটেইনত ডাঙৰ-দীঘল হৈছিল। তেওঁ ৮টা ভাষা জানে। তেওঁৰ লালন-পালন, বিভিন্ন সংস্কৃতিৰ জ্ঞান আৰু জীৱনৰ প্ৰতি স্বতন্ত্ৰ দৃষ্টিভংগীয়ে তেওঁক বৌদ্ধ শিক্ষাৰ প্ৰতি আকৰ্ষিত কৰিছিল আৰু তাত তেওঁ সুখ অনুভৱ কৰিছিল।
বৌদ্ধ সন্যাসীৰ দৰে জীৱন অতিবাহিত কৰিলেও অৱশ্যে তেওঁ মাজে সময়ে পৰিয়ালৰ লোকক সাক্ষাত কৰিবলৈ নিজৰ ঘৰলৈ আহে আৰু সেই সময়তো তেওঁ অতি সাধাৰণভাৱে থাকে।
