আম আদমি পাৰ্টীৰ বিধায়ক নৰেশ বালিয়ানক দিল্লী আৰক্ষীৰ ক্ৰাইম ব্ৰাঞ্চে গ্ৰেপ্তাৰ কৰিছে। দিল্লী আৰক্ষীয়ে জেৰাৰ কৰাৰ পিছতে নৰেশ বালিয়ানক গ্ৰেপ্তাৰ কৰা হয়। ধন দাবীৰ গোচৰত বিধায়কগৰাকীৰ বিৰুদ্ধে এই ব্যৱস্থা গ্ৰহণ কৰা হৈছে।
উল্লেখ্য যে, ইয়াৰ পূৰ্বে বিজেপিয়ে নৰেশ বালিয়ানৰ এটা অডিঅ’ ক্লিপ মুকলি কৰিছিল। সেই অডিঅ’ ক্লিপটো হ’ল বালিয়ান আৰু কুখ্যাত গেংষ্টাৰ কপিল চাংৱান ওৰফে নন্দুৰ মাজত হোৱা কথা-বতৰা। ভাইৰেল হোৱা এই ক্লিপটোত বিধায়কজনে ব্যৱসায়ীসকলৰ পৰা মুক্তিপণৰ ধন সংগ্ৰহৰ বিষয়ে আলোচনা কৰা বুলি অভিযোগ উত্থাপন হৈছিল।
নৰেশ বালিয়ানৰ গ্ৰেপ্তাৰ সন্দৰ্ভত আম আদমি পাৰ্টীয়ে মন্তব্য প্ৰকাশ কৰি ইয়াৰ বাবে বিজেপিক জগৰীয়া কৰে। অৰবিন্দ কেজৰিৱাল আৰু তেওঁৰ সহযোগীসকলক বিজেপিয়ে সদায় দমন কৰাৰ বাবে উঠি পৰি লাগিছে বুলিও স্পষ্টভাৱে কয় আম আদমি পাৰ্টীয়ে।
নৰেশ বালিয়ানক গ্ৰেপ্তাৰ কৰাটোৱে বিজেপিৰ হতাশাক উদঙাই দিয়ে আৰু ইয়ে প্ৰমাণ কৰে যে বিজেপিয়ে গেংষ্টাৰক আশ্ৰয় দিয়ে আৰু নিৰীহক জেলত ভৰাই দিয়ে। এই মন্তব্য আম আদমি পাৰ্টীৰ।
