ভাৰতৰ বিৰুদ্ধে পিংক বলেৰে খেলিবলগীয়া বৰ্ডাৰ-গাভাস্কাৰ ট্ৰফীৰ দ্বিতীয়খন টেষ্টৰ পূৰ্বে অষ্ট্ৰেলিয়া দলৰ বাবে আহিছে এটা বেয়া খবৰ। আঘাতৰ বাবে ৬ ডিচেম্বৰৰ পৰা হ’বলগীয়া দিবা নৈশ টেষ্টখনৰ পৰা বাহিৰ হৈছে দলটোৰ মুখ্য বেগী বলাৰ জছ হেজলউড।
হেজলউডৰ ঠাইত নিৰ্বাচকে ছীন এবট আৰু ব্ৰেণ্ডন ডোগেটক দলত স্থান দিছে। ক্ৰিকেট অষ্ট্ৰেলিয়াই শনিবাৰে এক বিবৃতিত কয় যে আঘাতৰ বাবে অষ্ট্ৰেলিয়া দলৰ অনুভৱী বেগী বলাৰ জছ হেজলউডে এডিলেইডত হ’বলগীয়া দিবা-নৈশ টেষ্ট মেচখনৰ পৰা বাহিৰ হৈছে। শৰীৰৰ বাঁওফালে সাধাৰণ আঘাত পাইছে বলাৰগৰাকীয়ে।
উল্লেখ্য যে, পাৰ্থ টেষ্টত অষ্ট্ৰেলিয়া দলৰ হৈ একমাত্ৰ জছ হেজলউডেই শ্ৰেষ্ঠ প্ৰদৰ্শন আগবঢ়াইছিল। তেওঁ প্ৰথম ইনিংছত চাৰিটা উইকেট লাভ কৰাৰ লগতে দ্বিতীয় ইনিংছত এটা উইকেট লাভ কৰিছিল।
ছীন এবট আৰু ব্ৰেণ্ডন ডোগেট কোন?
বেগী বলাৰ ডোগেটে চলিত ছিজনত তিনিখন শ্বিল্ড মেচত ৩৪.২৭ গড়ে ১১টা উইকেট দখল কৰিছে। আনহাতে ৩২ বছৰীয়া ছীন এবটে ছুটী সংস্কৰণত অষ্ট্ৰেলিয়াৰ হৈ এজন ভাল খেলুৱৈ হিচাপে প্ৰমাণিত হৈছে। ২০১৪ চনৰ অক্টোবৰ মাহত আন্তঃৰাষ্ট্ৰীয় অভিষেক ঘটোৱাৰ পিছত তেওঁ ২৬খন এদিনীয়া আৰু ২০খন টি-২০ মেচ খেলিছে যদিও এতিয়ালৈকে এখনো টেষ্ট মেচ খেলাৰ সুযোগ পোৱা নাই। এই ছিজনত শ্বিল্ডৰ দুখন মেচত গড়ে ১৯.৮৪ ৰানত ১৩টা উইকেট দখল কৰিছে এবটে।
