শেহতীয়াকৈ অনুষ্ঠিত হৈ যোৱা মহাৰাষ্ট্ৰৰ বিধানসভা নিৰ্বাচনত বিজেপি নেতৃত্বাধীন মহাযুটিয়ে একচেটীয়া বিজয় সাব্যস্ত কৰিছে। নিৰকুংশ বিজয় সাব্যস্ত কৰাৰ পিছতো মিত্ৰজোঁটে এই পৰ্যন্ত চূড়ান্ত কৰিব পৰা নাই মুখ্যমন্ত্ৰীৰ নাম।
বিজেপিৰ জ্যেষ্ঠ নেতা দেৱেন্দ্ৰ ফাড়নবিশ মুখ্যমন্ত্ৰী হোৱাটো একপ্ৰকাৰ নিশ্চিত হোৱাৰ মাজতে এইবাৰ তদাৰকী মুখ্যমন্ত্ৰী একনাথ সিন্দেই মুখ্যমন্ত্ৰী সন্দৰ্ভত কৰিছে এক তাৎপৰ্যপূৰ্ণ মন্তব্য।
মুখ্যমন্ত্ৰীৰ আসনখন এৰিব নোখোজা শিৱসেনাৰ নেতা এখনাথ সিন্দেই কয় যে তেওঁক ৰাজ্যৰ জনসাধাৰণে মুখ্যমন্ত্ৰীৰূপে চাব বিচাৰে। ইয়াৰ পূৰ্বে তেওঁ কৈছিল যে যদিহে মিত্ৰজোঁটত অজিত পাৱাৰ নেতৃত্বাধীন এন চি পি নাথাকিলহেতেন তেন্তে তেওঁৰ দলে ৯০ৰ পৰা ১০০খন আসনত প্ৰতিদ্বন্দ্বিতা কৰিলেহেতেন আৰু আসনৰ সংখ্যা বৃদ্ধি পালেহেতেন।
এটা ৰাষ্ট্ৰীয় সংবাদ মাধ্যমত দিয়া সাক্ষাৎকাৰত তেওঁ কয়, ‘মই জনতাৰ মুখ্যমন্ত্ৰী। মই সদায় কৈ আহিছো যে মুখ্যমন্ত্ৰী হোৱাৰ উপৰিও মই এজন সাধাৰণ নাগৰিকো। ৰাইজৰ সমস্যাবোৰ মই জানো আৰু লগতে বুজি পাওঁ তেওঁলোকৰ বেদনা। মই জনসাধাৰণৰ সমস্যা সমাধানৰ চেষ্টা কৰিছো। মই সাধাৰণ মানুহৰ বাবে কাম কৰো। এই কাৰণে মানুহে বিশ্বাস কৰে যে মই মুখ্যমন্ত্ৰী হোৱা উচিত।’
এখনাথ সিন্দেৰ এই মন্তব্যৰ বিপৰীতে বিজেপিৰ জ্যেষ্ঠ নেতা প্ৰবীন দৰেকৰে দেওবাৰে প্ৰদান কৰিছে এক ডাঙৰ মন্তব্য। তেওঁ কয়, ‘মহাযুটিত কোনো সংঘাত নাই। এতিয়া ৫ ডিচেম্বৰত মহাযুটি চৰকাৰৰ শপতগ্ৰহণ অনুষ্ঠান অনুষ্ঠিত হ’ব। তিনিওটা দলৰ নেতাই শপত গ্ৰহণ কৰিব।’
উল্লেখ্য যে, ২০ নৱেম্বৰত অনুষ্ঠিত হৈ যোৱা বিধানসভা নিৰ্বাচনত বিজেপি, একনাথ সিন্দেৰ শিৱসেনা আৰু অজিত পাৱাৰ নেতৃত্বাধীন এন চি পিয়ে ২৮৮ খন আসনৰ ভিতৰত ২৩০ খন আসনতেই জয় লাভ কৰিছিল।
এই নিৰ্বাচনত ১৩২ খন আসন দখল কৰি সৰ্ববৃহত দল হিচাপে পৰিগণিত হৈছে বিজেপি। ইফালে একনাথ সিন্দে বাহিনীয়ে ৫৭ খন আৰু অজিত পাৱাৰ এন চি পিয়ে ৪১ খন আসনত জয় লাভ কৰিছিল।
