পশ্চিম আফ্ৰিকাৰ দেশ গিনিত এখন ফুটবল খেলৰ সময়ত তীব্ৰ হিংসাত্মক পৰিস্থিতিৰ সৃষ্টি হৈছে। খেলখন চলি থকা সময়তে দুয়োপক্ষৰ অনুৰাগীসকলৰ মাজত হোৱা ৰক্তাক্ত সংঘৰ্ষত ১০০ জনতকৈও অধিক লোকৰ মৃত্যু হোৱাৰ তথ্য পোহৰলৈ আহিছে।
জানিব পৰা মতে, দেওবাৰে গিনিৰ দ্বিতীয় বৃহত্তম চহৰ এনজেৰেকোৰত সংঘটিত এই ঘটনা সন্দৰ্ভত নাম প্ৰকাশ নকৰাৰ চৰ্তত এজন চিকিৎসকে কয়, ‘চকুৰে দেখা পোৱালৈকে চিকিৎসালয়ত কেৱল মৃতদেহৰ শাৰী। বহু মৃতদেহ পৰি আছে মজিয়াত, মৃতদেহেৰে ভৰি পৰিছে মৰ্গ।’
উল্লেখ্য যে, ফুটবল খেলৰ সময়ত সংঘটিত এই হিংসাৰ বহু ভিডিঅ’ সম্প্ৰতি ছ’চিয়েল মিডিয়াত ভাইৰেল হৈ পৰিছে। ছ’চিয়েল মিডিয়াত ভাইৰেল হোৱা এই ভিডিঅ’সমূহ সেই ঘটনাৰ সৈতে জড়িত হয় নে নহয় সেয়া নিশ্চিত কৰিব পৰা নাই।
প্ৰত্যক্ষদৰ্শীৰ ভাষ্য অনুসৰি, ক্ষুব্ধ প্ৰতিবাদকাৰীয়ে এখন স্থানীয় থানাও ভাঙি লণ্ড ভণ্ড কৰি জুই লগাই দিয়ে।
এজন প্ৰত্যক্ষদৰ্শীয়ে আন্তঃৰাষ্ট্ৰীয় সংবাদ সংস্থা এটাক কয়, ‘মেচ ৰেফাৰীয়ে দিয়া এটা নিৰ্ণয়ক লৈ এই হিংসাৰ সূত্ৰপাত ঘটে। ৰেফাৰীৰ নিৰ্ণয়ক লৈ অসন্তুষ্ট অনুৰাগীয়ে খেলপথাৰত তাণ্ডৱ চলায়। ঘটনাই নিমিষতে ভয়ংকৰ ৰূপ ধাৰণ কৰাত প্ৰায় এশৰো অধিক লোক নিহত হোৱাৰ লগতে বহু লোক গুৰুতৰভাৱে আহত হয়।
জুণ্টা নেতা মমাদী ডোম্বায়াৰ সন্মানত আয়োজন কৰা হৈছিল এই ফুটবল মেচখন।
