বাংলাদেশত জনসাধাৰণৰ ব্যাপক বিক্ষোভৰ পিছতেই ৫ আগষ্টত অভ্যুত্থান ঘটে। আৱামী লীগৰ চৰকাৰৰ পতন আৰু দেশৰ প্ৰধানমন্ত্ৰী শ্বেখ হাছিনাৰ পলায়নৰ পিছত নৱগঠিত অন্তৱৰ্তীকালীন চৰকাৰে ১৫ আগষ্টৰ ৰাজহুৱা বন্ধৰ সিদ্ধান্ত বাতিল কৰে।
আগষ্ট মাহত বাংলাদেশত সংঘটিত অভ্যুত্থানৰ পিছতেই ক্ষিপ্ৰতাৰে সলনি কৰা হৈছে সিদ্ধান্ত।নতুন আইনৰ আদেশত বাংলাদেশত ১৫ আগষ্টত ঘোষণা কৰা চৰকাৰী বন্ধৰ দিনটো নিষিদ্ধ কৰা হৈছে।
দেশৰ উচ্চতম ন্যায়ালয়ৰ আপীলীয় বিভাগে উচ্চ ন্যায়ালয়ৰ সিদ্ধান্তত স্থগিত ৰাখিছে, য’ত ১৫ আগষ্টক ৰাষ্ট্ৰীয় শোক দিৱস হিচাপে ৰাজহুৱা বন্ধ ঘোষণা কৰা হৈছিল।
উচ্চ ন্যায়ালয়ৰ সিদ্ধান্তৰ বিৰুদ্ধে আবেদনৰ শুনানি গ্ৰহণ কৰি সোমবাৰে এই নিৰ্দেশ জাৰি কৰে মুখ্য ন্যায়াধীশ চৈয়দ ৰেফাত আহমেদে। ১৯৯৬ চনত আৱামি লীগ পাৰ্টী ক্ষমতালৈ অহাৰ পিছত ১৫ আগষ্টক ৰাষ্ট্ৰীয় শোক দিৱস হিচাপে ঘোষণা কৰা হয় আৰু প্ৰতি বছৰে এই দিৱস পালন কৰা হয়।
ৰাষ্ট্ৰীয় শোক দিৱস এইকাৰণেই পালন কৰা হয়, কাৰণ সেই দিনটোতে বাংলাদেশৰ প্ৰতিষ্ঠাপক বংগবন্ধু শ্বেখ মুজিবুৰ ৰহমান আৰু তেওঁৰ পৰিয়ালক শেষ কৰি দিয়া হৈছিল। তেওঁলোকৰ ত্যাগক সন্মান জনাই শ্বেখ হাছিনা চৰকাৰে এই দিনটোক ৰাজহুৱা বন্ধ হিচাপে ঘোষণা কৰি ৰাষ্ট্ৰীয় শোক দিৱস হিচাপে পালন কৰিবলৈ আৰম্ভ কৰে।
কিন্তু ২০০২ চনত বাংলাদেশ জাতীয়তাবাদী পাৰ্টী (BNP) নেতৃত্বাধীন মিত্ৰজোঁটৰ চৰকাৰে ১৫ আগষ্টক ৰাষ্ট্ৰীয় শোক দিৱস হিচাপে পালন কৰাৰ সিদ্ধান্ত বাতিল কৰে। তাৰ পিছত ৬ বছৰৰ পাছত উচ্চ ন্যায়ালয়ে বাতিলৰ সিদ্ধান্ত বাতিল কৰি এই দিনটোক পুনৰ ৰাষ্ট্ৰীয় শোক দিৱস হিচাপে প্ৰতিষ্ঠা কৰে।
প্ৰায় ছবছৰৰ পাছত ২০০৮ চনৰ ২৭ জুলাইত উচ্চ ন্যায়ালয়ে ১৫ আগষ্টক ৰাষ্ট্ৰীয় শোক দিৱস হিচাপে পুনৰ প্ৰতিষ্ঠা কৰে। ইয়াৰ পিছত ২০০৯ চনত উচ্চ ন্যায়ালয়ে ১৫ আগষ্টক আনুষ্ঠানিকভাৱে ৰাষ্ট্ৰীয় শোক দিৱস হিচাপে ঘোষণা কৰে আৰু তেতিয়াৰ পৰা এই তাৰিখটো ৰাষ্ট্ৰীয় শোক দিৱস হিচাপে পালন কৰা হয়।
কিন্তু ৫ আগষ্টত জনসাধাৰণৰ ব্যাপক বিক্ষোভ, আৱামী লীগ চৰকাৰ উৎখাত আৰু দেশৰ পৰা প্ৰধানমন্ত্ৰী শ্বেখ হাছিনাৰ পলায়নৰ পিছত নৱগঠিত অন্তৱৰ্তীকালীন চৰকাৰে ১৫ আগষ্টৰ বাবে চৰকাৰী বন্ধৰ সিদ্ধান্ত বাতিল কৰে।
১৩ আগষ্টত অন্তৱৰ্তীকালীন চৰকাৰৰ মুৰব্বী ড০ মহম্মদ ইউনুছৰ অধ্যক্ষতাত অনুষ্ঠিত পৰামৰ্শদাতা পৰিষদৰ বৈঠকত এই ছুটী বাতিলৰ সিদ্ধান্তত অনুমোদন জনোৱা হয়।
ইয়াৰ এদিন পূৰ্বে দেওবাৰে স্থানীয় উচ্চ ন্যায়ালয়ে পূৰ্বৰ ৰায় বাতিল কৰি ২০০৪ চনত আয়োজিত ৰাজনৈতিক সমাৱেশত গ্ৰেনেড আক্ৰমণৰ সৈতে জড়িত গোচৰটোৰ পৰা প্ৰাক্তন প্ৰধানমন্ত্ৰী খালেদা জিয়াৰ পুত্ৰ তাৰিক ৰেহমান আৰু আন ৪৮ জন লোকক দোষমুক্ত কৰে। ২০১৮ চনত ৰেলীত গ্ৰেনেড আক্ৰমণৰ গোচৰত ৰেহমান আৰু আন ৪৮ জন লোকক দোষী সাব্যস্ত কৰা হৈছিল।
এই দুৰ্ঘটনাত ২৪ জন লোকে প্ৰাণ হেৰুওৱাৰ লগতে আহত হয় শ শ লোক। তেতিয়া বিৰোধী দলত আছিল শ্বেখ হাছিনা আৰু প্ৰধানমন্ত্ৰী খালেদা জিয়া। এই সিদ্ধান্তত উচ্চ ন্যায়ালয়ে ৰেহমানক যাৱজ্জীৱন কাৰাদণ্ড আৰু আন ১৯জন দোষীক কঠোৰ শাস্তি প্ৰদান কৰিছিল।
