অহা ৫ ডিচেম্বৰত মহাৰাষ্ট্ৰই লাভ কৰিব পৰৱৰ্তী মুখ্যমন্ত্ৰী। আজাদ ময়দানত মুখ্যমন্ত্ৰীৰ শপতগ্ৰহণৰ প্ৰস্তুতি অব্যাহত আছে। ইফালে বিজেপিৰ বিধায়িনী দলৰ বৈঠকত দেৱেন্দ্ৰ ফাড়নাবিশ নেতা হিচাপে নিৰ্বাচিত হৈছে।
বিধায়িনী দলৰ নেতা হিচাপে দেৱেন্দ্ৰ ফাড়নাবিশ নিৰ্বাচিত হোৱাৰ পিছত সিদ্ধান্ত লোৱা হৈছে যে, তেওঁ মহাৰাষ্ট্ৰৰ পৰৱৰ্তী মুখ্যমন্ত্ৰী হ’ব। মূল সমিতিৰ বৈঠকত ফাড়নাবিশৰ নাম অনুমোদন কৰা হয়। সুধীৰ মুংগনতিৱাৰ আৰু চন্দ্ৰকান্ত পাটিলক প্ৰস্তাৱক হিচাপে নিযুক্তি দিয়া হৈছে। আনহাতে আশীষ শ্বেলাৰ আৰু ৰবীন্দ্ৰ চাভানে এই প্ৰস্তাৱত অনুমোদন জনাব।
বুধবাৰে মহাৰাষ্ট্ৰ বিধানসভাত বিজেপি বিধায়িনী দলৰ বৈঠক অনুষ্ঠিত হয়। এই বৈঠকৰ সভাপতিত্বত আছিল কেন্দ্ৰীয় পৰ্যবেক্ষক হিচাপে অহা বিত্তমন্ত্ৰী নিৰ্মলা সীতাৰমণ আৰু গুজৰাটৰ প্ৰাক্তন মুখ্যমন্ত্ৰী বিজয় ৰূপানীয়ে।
বিজেপিৰ পৰা নৱনিৰ্বাচিত বিধায়ক প্ৰবীণ বসন্তৰাও টাইডে কয় যে, মুখ্যমন্ত্ৰীৰ পদৰ বাবে দেৱেন্দ্ৰ ফাড়নাবিশক নিৰ্বাচিত কৰা হৈছে। মহাৰাষ্ট্ৰত ইতিবাচক পৰিৱৰ্তন আৰু উন্নতি কঢ়িয়াব পৰা নেতা। সকলো বিধায়কে তেওঁক নিৰ্বাচিত কৰিছে। ৫বছৰ চৰকাৰ চলোৱাৰ অভিজ্ঞতা তেওঁৰ আছে।
বিজেপিৰ নৱনিৰ্বাচিত বিধায়ক ৰবি ৰাজাই কয় যে, দেৱেন্দ্ৰ ফাড়নাবিশ মহাৰাষ্ট্ৰৰ পৰৱৰ্তী মুখ্যমন্ত্ৰী হ’ব। সমগ্ৰ দলে এই সিদ্ধান্তক সমৰ্থন কৰিছে। মহাৰাষ্ট্ৰৰ অগ্ৰগতিৰ বাবে দেৱেন্দ্ৰ ফাড়নাবিশৰ নেতৃত্বৰ অধিক প্ৰয়োজন। একনাথ সিণ্ডে আৰু অজিত পাৱাৰে উপ-মুখ্যমন্ত্ৰী হিচাপে কাম কৰিব।
যদিও আনুষ্ঠানিক ঘোষণাৰ বাবে অপেক্ষা কৰা হৈছে, তথাপিও ফাড়নাবিশক মুখ্যমন্ত্ৰী হিচাপে পুনৰ নিযুক্তি দিয়াৰ সিদ্ধান্ত লোৱা হৈছে। অহা ৫ ডিচেম্বৰত আজাদ ময়দানত শপত গ্ৰহণ কৰিব নতুন মুখ্যমন্ত্ৰী দেৱেন্দ্ৰ ফাড়নাবিশে।
এই সিদ্ধান্তক দেৱেন্দ্ৰ ফাড়নাবিশৰ জনপ্ৰিয়তা আৰু প্ৰশাসনিক দক্ষতাৰ প্ৰতি ইংগিত হিচাপে গণ্য কৰা হৈছে, যিটোৱে নিৰ্বাচনত মহাযুটীৰ তাৰকাময় প্ৰদৰ্শনত গুৰুত্বপূৰ্ণ ভূমিকা পালন কৰিছিল বুলি দলটোৱে বিশ্বাস কৰে। একনাথ সিণ্ডে নতুন গ্ৰেণ্ড এলায়েন্স চৰকাৰত উপ-মুখ্যমন্ত্ৰী হিচাপে কাৰ্যনিৰ্বাহ কৰিবলৈ সন্মত হৈছে।
