আজি মহাৰাষ্ট্ৰই লাভ কৰিব নতুন মুখ্যমন্ত্ৰী। সন্ধিয়া ৫:৩০ বজাত মুম্বাইৰ আজাদ ময়দানত মুখ্যমন্ত্ৰী হিচাপে শপত গ্ৰহণ কৰিব দেৱেন্দ্ৰ ফাড়নাৱিশে। লগতে যোৱাবাৰৰ দৰে দুজন উপ মুখ্যমন্ত্ৰীও থাকিব এই চৰকাৰত।
প্ৰধানমন্ত্ৰী নৰেন্দ্ৰ মোদী আৰু এন ডি এ শাসিত ৰাজ্যৰ মুখ্যমন্ত্ৰীসকলেও শপতগ্ৰহণ অনুষ্ঠানত অংশগ্ৰহণ কৰিব।
বুধবাৰে মহাৰাষ্ট্ৰত বিজেপিৰ বিধায়িনী দলৰ নেতা হিচাপে নিৰ্বাচিত হয় দেৱেন্দ্ৰ ফাড়নাৱিশ। ইয়াৰ পিছতে ভাৰপ্ৰাপ্ত মুখ্যমন্ত্ৰী এক নাথ সিণ্ডে আৰু অজিত পাৱাৰৰ সৈতে ফাড়নাৱিশে ৰাজ্যপাল চি পি ৰাধাকৃষ্ণনৰ সন্মুখত চৰকাৰ গঠনৰ দাবী জনায়। এই সময়ত বিজয় ৰূপানী আৰু বিজেপিয়ে পৰ্যবেক্ষক হিচাপে প্ৰেৰণ কৰা বিত্তমন্ত্ৰী নিৰ্মলা সীতাৰমণো উপস্থিত থাকে।
ফাড়নাৱিশৰ লগতে মহাৰাষ্ট্ৰ চৰকাৰত থাকিব দুজন উপ মুখ্যমন্ত্ৰীও। ইয়াৰ ভিতৰত এটা নাম এন চি পি নেতা অজিত পাৱাৰৰ বুলি ধাৰণা কৰা হৈছে যদিও আনটো কাৰ নাম হ’ব সেয়া এই মুহূৰ্তত সিদ্ধান্ত লোৱা হোৱা নাই।
ৰাজ্যপালৰ সন্মুখত চৰকাৰ গঠনৰ দাবী উঠাৰ পিছত মহাযুটিৰ নেতাসকলে সংবাদমেলত কৈছিল যে, কোন মন্ত্ৰীয়ে মন্ত্ৰী হিচাপে শপত গ্ৰহণ কৰিব সেই সম্পৰ্কে তথ্য দিয়া হ’ব। একেখন সংবাদমেলতে অজিত পাৱাৰে কৈছিল যে,কোনে শপত ল’ব সেইটো নিৰ্ণয় কৰা হ’ব আজি, কিন্তু তেওঁ যে শপত ল’ব সেয়া নিশ্চিত।
শপত গ্ৰহণৰ পূৰ্বে কোৱা হৈছে যে, গ্ৰেণ্ড এলায়েন্সৰ তিনিটা দলৰ মাজত মন্ত্ৰালয়সমূহ বিভক্ত কৰা হৈছে। সূত্ৰই দাবী কৰিছে যে, বিজেপিয়ে মহাৰাষ্ট্ৰ চৰকাৰৰ গৃহ মন্ত্ৰালয়ক নিজৰ লগত ৰাখিব।
মুম্বাইৰ আজাদ ময়দানত অনুষ্ঠিত হ’ব মহাৰাষ্ট্ৰ চৰকাৰৰ শপতগ্ৰহণ অনুষ্ঠান। ইয়াত প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ লগতে এন ডি এ শাসিত ৰাজ্যৰ অন্যান্য কেন্দ্ৰীয় মন্ত্ৰী আৰু মুখ্যমন্ত্ৰীও উপস্থিত থাকিব। এই অনুষ্ঠানত প্ৰায় চল্লিশ হাজাৰ লোকে অংশগ্ৰহণ কৰাৰ সম্ভাৱনা আছে।
ইতিমধ্যে শপত গ্ৰহণৰ নিমন্ত্ৰণী পত্ৰখন ছ’চিয়েল মিডিয়াত ভাইৰেল হৈ পৰিছে, য’ত দেৱেন্দ্ৰ ফাড়নাৱিশৰ নামৰ লগতে তেওঁৰ মাতৃ আৰু পিতৃৰ নামো লিখা আছে। মহাৰাষ্ট্ৰৰ মুখ্য সচিব সুজাতা সৈনিকে প্ৰেৰণ কৰা এই কাৰ্ডখনত ফাড়নাৱিশৰ সম্পূৰ্ণ নাম লিখা আছে দেৱেন্দ্ৰ সৰিতা গংগাধৰাও ফাড়নাৱিশ। সৰিতা মাকৰ নাম আৰু গংগাধৰ ৰাও পিতৃৰ নাম।
