ৰাজ্যসভাৰ সাংসদ অভিষেক মনু সিংভিয়ে বহা আসনৰ তলৰ পৰা টকাৰ বান্দিল উদ্ধাৰ হোৱা ঘটনাই সম্প্ৰতি দেশজুৰি তীব্ৰ প্ৰতিক্ৰিয়াৰ সৃষ্টি কৰিছে। জানিব পৰা অনুসৰি, কালি নিৰাপত্তাৰক্ষীয়ে তদন্তৰ অন্তত সাংসদ অভিষেক মনু সিংভিৰ আসনৰ তলৰ পৰা টকাৰ বান্দিল উদ্ধাৰ কৰিছিল।
টকা উদ্ধাৰ হোৱা ঘটনাক লৈ আজি ৰাজ্যসভা উত্তাল হৈ পৰে। পৰিস্থিতি অধিক উত্তেজনাময় হোৱাৰ পিছত ৰাজ্যসভাৰ অধ্যক্ষ জগদীপ ধনখড়ে ঘটনাটোৰ হস্তক্ষেপ কৰি কয়, ‘মই সদস্যসকলক জনাব বিচাৰিছো যে কালি সদনৰ কাম-কাজ সমাপ্ত হোৱাৰ পিছত সদনত নিৰাপত্তাৰক্ষীয়ে চলোৱা নিয়মীয়া তালাচীৰ সময়ত ২২২ নং আসনৰ পৰা এটা টকাৰ বান্দিল উদ্ধাৰ হয়। এই আসনখন তেলেংগানাৰ পৰা নিৰ্বাচিত সাংসদ অভিষেক মনু সিংভিৰ নামত আৱণ্টিত। এই ঘটনাটো মোক অৱগত কৰোৱা হৈছিল, আৰু মই তদন্ত সুনিশ্চিত কৰিছিলো আৰু ইয়াৰ তদন্ত চলি আছে।’
ইফালে এই ঘটনা সন্দৰ্ভত নিজৰ প্ৰতিক্ৰিয়া প্ৰকাশ কৰিছে সাংসদ অভিষেক মনু সিংভিয়ে। তেওঁ কয়, ‘মই এই কথা শুনি যথেষ্ট আচৰিত হৈছো। এই বিষয়ে মই জ্ঞাত নাছিলো। কালি দুপৰীয়া ১২:৫৭ বজাত সদনত প্ৰৱেশ কৰিছিলোঁ আৰু ১ বজাৰ পৰা সদনৰ সভা আৰম্ভ হয়। মই ৩-৪ মিনিট থকাৰ পিছত ১ৰ পৰা ১.৩০ বজালৈকে অযোধ্যা প্ৰসাদৰ সৈতে কেণ্টিনত খাদ্যগ্ৰহণ কৰিছিলো। মই ১.৩০ বজাত প্ৰস্থান কৰিছো, অৰ্থাত সদনত মই মুঠ ৩ মিনিট আছিলো। এয়া আশ্বৰ্যকৰ যে এই ঘটনা সন্দৰ্ভত ৰাজনীতি আৰম্ভ হৈছে।’
তেওঁ লগতে কয়, ‘কোনো আসনত সামগ্ৰী বা বস্তু কেনেদৰে ৰখা হ’ল তাৰ তদন্ত নিশ্বয় হ’ব লাগে। প্ৰতিখন আসনতে তলাৰ ব্যৱস্থা থাকিব লাগে আৰু ইয়াৰ ছাবি নিৰ্দিষ্ট সাংসদগৰাকীৰ ওচৰত থাকিব লাগে, নহ’লে যিকোনো বস্তু ৰাখিব পাৰে আৰু আৰোপ কৰিব পাৰে অভিযোগ। এয়া অত্যন্ত দুখজনক আৰু চিন্তনীয়ৰ লগতে হাস্যকৰো। এই ঘটনাৰ ৰহস্য ভেদ কৰিবলৈ সকলোৱে সহযোগ কৰিব লাগে।’
এগৰাকী সাংসদৰ আসনৰ পৰা টকাৰ বান্দিল উদ্ধাৰ হোৱা ঘটনাক লৈ বৰ্তমান শাসক-বিৰোধীৰ মাজত তীব্ৰ বাক্যবাণ আৰম্ভ হোৱাও পৰিলক্ষিত হৈছে।
