নিউজিলেণ্ড আৰু ইংলেণ্ডৰ বিৰুদ্ধে চলি থকা টেষ্ট শৃংখলাৰ তৃতীয়খন মেচত ঘৰুৱা দল নিউজিলেণ্ডৰ অনুভৱী বেটাৰ কেন উইলিয়ামছনে দ্বিতীয় ইনিংছত শতক অৰ্জন কৰি ইতিহাস ৰচিবলৈ সক্ষম হয়। টেষ্ট কেৰিয়াৰত উইলিয়ামছনৰ এইটো ৩৩ সংখ্যক শতক।
উল্লেখণীয় কথাটো হ’ল যে ১৪৭ বছৰীয়া টেষ্ট ক্ৰিকেট ইতিহাসত এখন ষ্টেডিয়ামতে একেৰাহে পাঁচটা শতক অৰ্জন কৰা বিশ্বৰ একমাত্ৰ বেটছমেন হিচাপে পৰিগণিত হয় উইলিয়ামছন। ইয়াৰ উপৰি দ্ৰুতগতিত ৩৩টা শতক অৰ্জন কৰা তৃতীয়জন ক্ৰিকেটাৰ হিচাপেও পৰিগণিত হয়।
আনহাতে নিউজিলেণ্ডৰ হৈ টেষ্টত সৰ্বাধিক শতক অৰ্জন কৰা খেলুৱৈ হিচাপেও পৰিগণিত হৈছে উইলিয়ামছন।
উল্লেখ্য যে ইংলেণ্ডৰ বিৰুদ্ধে অনুষ্ঠিত তৃতীয়খন মেচৰ দ্বিতীয় ইনিংছত উইলিয়ামছনে ছয়ৰ সহায়ত নিজৰ শতক সম্পূৰ্ণ কৰে। তদুপৰি এখন ষ্টেডিয়ামতে একেৰাহে পাঁচটা শতক অৰ্জন কৰা ক্ৰিকেটাৰৰ তালিকাতো শীৰ্ষ স্থানত অধিষ্ঠিত হয় উইলিয়ামছন।
উইলিয়ামছনে ২০১৯ত বাংলাদেশৰ বিৰুদ্ধে ২০০, ২০১৯ত ইংলেণ্ডৰ বিৰুদ্ধে ১০৪, ২০২০ত ৱেষ্টইণ্ডিজৰ বিৰুদ্ধে ২৫১, ২০২৪ত দক্ষিণ আফ্ৰিকাৰ বিৰুদ্ধে ১৩৩ আৰু এইবাৰ পুনৰ ইংলেণ্ডৰ বিৰুদ্ধে ১৫৬ ৰানৰ ইনিংছ খেলে। উইলিয়ামছনে হেমিল্টনৰ চেড্ডন পাৰ্কত খেলি একেৰাহে পাঁচটা শতক অৰ্জন কৰাৰ লগতে এই ষ্টেডিয়ামখনত উইলিয়ামছনৰ এয়া সপ্তমটো শতক।
টেষ্টত সৰ্বাধিক ৩৩টা শতক অৰ্জন কৰাৰ ক্ষেত্ৰত কেন উইলিয়ামছনে বিশ্বৰ ভিতৰতে তৃতীয় স্থান লাভ কৰিছে। তেওঁৰ আগত আছে ৰিকি পণ্টিং আৰু শচীন তেণ্ডুলকাৰ। উইলিয়ামছনৰ পিছত আছে ইউনিছ খান আৰু ষ্টিভ স্মিথ। টেষ্টৰ ১৮৬ সংখ্যক ইনিংছত ৩৩ সংখ্যক টেষ্ট শতক সম্পূৰ্ণ কৰিলে কেন উইলিয়ামছনে।
