২০ জানুৱাৰীত আমেৰিকাৰ নৱনিৰ্বাচিত ৰাষ্ট্ৰপতি ড’নাল্ড ট্ৰাম্পে শপত গ্ৰহণ কৰিব। শপত লোৱাৰ পূৰ্বে ট্ৰাম্পে নিজৰ দল প্ৰস্তুত কৰি আছে। দেওবাৰে ট্ৰাম্পে ভাৰতীয় আমেৰিকান উদ্যোগী তথা লেখক শ্ৰীৰাম কৃষ্ণনক কৃত্ৰিম বুদ্ধিমত্তা (AI)ৰ ক্ষেত্ৰত হোৱাইট হাউছৰ জ্যেষ্ঠ নীতি উপদেষ্টা হিচাপে নিযুক্তি দিয়ে।
কৃত্ৰিম বুদ্ধিমত্তা (AI)ৰ ওপৰত কেইবাটাও নিযুক্তি ঘোষণা কৰি দেওবাৰে ট্ৰাম্পে কয় যে, শ্ৰীৰাম কৃষ্ণনে হোয়াইট হাউছৰ বিজ্ঞান আৰু প্ৰযুক্তি নীতিৰ কাৰ্যালয়ত কৃত্ৰিম বুদ্ধিমত্তা (AI)ৰ জ্যেষ্ঠ নীতি উপদেষ্টা হিচাপে কাৰ্যনিৰ্বাহ কৰিব।
শ্ৰীৰামৰ নিযুক্তিৰ কথা ঘোষণা কৰি ট্ৰাম্পে কয় যে, ডেভিদ চেক্সৰ সৈতে ঘনিষ্ঠভাৱে কাম কৰি শ্ৰীৰামে AI আৰু সমগ্ৰ চৰকাৰখনতে আমেৰিকাৰ নেতৃত্ব অব্যাহত ৰখাত গুৰুত্ব দিব, য’ত ৰাষ্ট্ৰপতিৰ বিজ্ঞান আৰু প্ৰযুক্তিৰ উপদেষ্টা পৰিষদৰ সৈতে কাম কৰি নীতি গঠন আৰু সমন্বয়ত সহায় কৰিব।
উল্লেখ্য যে, মাইক্ৰ’ছফটত উইণ্ড’জ এজুৰৰ প্ৰতিষ্ঠাপক সদস্য হিচাপে শ্ৰীৰামে নিজৰ কেৰিয়াৰ আৰম্ভ কৰিছিল।
কৃষ্ণনৰ এই নিযুক্তিক ভাৰতীয় আমেৰিকান সমাজে আদৰণি জনায়। ইণ্ডিয়াস্পোৰাৰ কাৰ্যবাহী সঞ্চালক সঞ্জীৱ যোশিপুৰাই কয় যে, তেওঁ শ্ৰীৰাম কৃষ্ণনক আন্তৰিকতাৰে অভিনন্দন জনাই আৰু নিৰ্বাচিত ৰাষ্ট্ৰপতি ড’নাল্ড ট্ৰাম্পে তেওঁক হোৱাইট হাউছৰ বিজ্ঞান আৰু প্ৰযুক্তি নীতিৰ কাৰ্যালয়ৰ জ্যেষ্ঠ নীতি উপদেষ্টা হিচাপে নিযুক্তি দিয়াত আনন্দিত হয়।
ট্ৰাম্পৰ দ্বিতীয় কাৰ্যকালত স্থান লাভ কৰিছে ভাৰতীয় মূলৰ বহু বিষয়াই। ভাৰতীয় মূলৰ কাছ পেটেলক এফ বি আইৰ সঞ্চালক হিচাপে নিযুক্তি দিছে ট্ৰাম্পে।
ইলন মাস্কৰ লগতে এই চৰকাৰত গুৰুত্বপূৰ্ণ ভূমিকা পালন কৰিব বিবেক ৰামাস্বামীয়ে। ন্যায় বিভাগ আৰু ৰাষ্ট্ৰীয় স্বাস্থ্য প্ৰতিষ্ঠানত সম্ভাৱ্য গুৰুত্বপূৰ্ণ ভূমিকা গ্ৰহণৰ বাবে প্ৰস্তুতি চলাইছে হৰমীত ধিলন আৰু জয় ভট্টাচাৰ্যই। ইয়াৰ উপৰিও নিৰ্বাচিত উপ-ৰাষ্ট্ৰপতি জে ডি ভ্যান্সৰ পত্নী উছা ভ্যান্স হ’ব প্ৰথমগৰাকী দক্ষিণ এছিয়ান আমেৰিকান দ্বিতীয় মহিলা।
