২০২৫ চনৰ তৃতীয় দিনটোতে সংঘটিত হয় এক বিমান দুৰ্ঘটনা। প্ৰতিদিনে যেনেকৈ ভূমিকম্প হবলৈ ধৰিছে, সেইদৰে প্ৰতিদিনে ক’ৰবাত নহয় ক’ৰবাত বিমান দুৰ্ঘটনাও সংঘটিত হৈয়ে আছে।
আজাৰবাইজান আৰু দক্ষিণ কোৰিয়াৰ পিছত এতিয়া দক্ষিণ কেলিফৰ্ণিয়াত বিমান দুৰ্ঘটনা সংঘটিত হৈছে। কেলিফৰ্ণিয়াৰ ৰেইমাৰ এভিনিউৰ ২৩০০ ব্লকত সংঘটিত হয় এই দুৰ্ঘটনা।
এখন সৰু বিমানে এটা ব্যৱসায়িক ভৱনৰ চালত খুন্দা মাৰি দুৰ্ঘটনাগ্ৰস্ত হয়। এই দুৰ্ঘটনাত ২ জন লোকে প্ৰাণ হেৰুওৱাৰ লগতে ১৮ জন লোক আহত হয়।
দুৰ্ঘটনাটোৰ তথ্য পোৱাৰ লগে লগে আৰক্ষী আৰু অগ্নিনিৰ্বাপক বাহিনীয়ে সেই স্থানত উপস্থিত হৈ বিমানখনৰ অগ্নি নিয়ন্ত্ৰণলৈ আনে। ইয়াৰ পূৰ্বে অট্টালিকাটো ভাঙি পৰাৰ আশংকা থকাৰ বাবে ওচৰৰ কাৰ্যালয় আৰু শ্ব’ৰুমসমূহো খালী কৰা হৈছিল।
লছ এঞ্জেলছৰ পৰা প্ৰায় ২৫ মাইল (৪০ কিলোমিটাৰ) দক্ষিণ-পূৱত অৱস্থিত কেলিফৰ্ণিয়াৰ অৰেঞ্জ কাউন্টিৰ ফুলাৰ্টনত সংঘটিত হয় এই দুৰ্ঘটনা। ভাৰতীয় সময় অনুসৰি নিশা প্ৰায় ২ বজাত সংঘটিত হয় এই দুৰ্ঘটনা।
সংবাদ মাধ্যমৰ বাতৰি অনুসৰি, ফুলাৰ্টন আৰক্ষীৰ মুখপাত্ৰ ক্ৰীষ্টি ওৱেলছে এই দুৰ্ঘটনা নিশ্চিত কৰি কয় যে, এই বিমানখনক একক ইঞ্জিনৰ ভ্যান আৰভি-১০ বুলি চিনাক্ত কৰা হৈছ যদিও, বিমানখন ক’ৰ পৰা আহিছিল আৰু ক’লৈ গৈ আছিল, এই কথা বৰ্তমানেও জানিব পৰা হোৱা নাই।
লগে লগে গুৰুতৰভাৱে আহত ৯ জনক চিকিৎসালয়ত ভৰ্তি কৰোৱা হয়। ডিজনীলেণ্ডৰ পৰা প্ৰায় ৬ মাইল দূৰত্বত অৱস্থিত ফুলাৰ্টন পৌৰ বিমানবন্দৰৰ সমীপত সংঘটিত হয় এই দুৰ্ঘটনা। সাধাৰণ বিমান সেৱা প্ৰদান কৰা এই বিমানবন্দৰত একক ৰাণৱে আৰু হেলিপৰ্ট আছে। আৱাসিক অঞ্চল, বাণিজ্যিক গুদাম আৰু মেট্ৰ’লিংক ৰে’ল লাইনেৰে আগুৰি থকা ব্যস্ত অঞ্চলত বিমানবন্দৰটো।
সংবাদ মাধ্যমৰ বাতৰি অনুসৰি ফুলাৰ্টন আৰক্ষীৰ মুখপাত্ৰ ক্ৰীষ্টি ওৱেলছে এছ’চিয়েটেড প্ৰেছক জনোৱা মতে, নিশা ২.০৯ বজাত (স্থানীয় সময় অনুসৰি) আৰক্ষীয়ে অৰেঞ্জ কাউন্টিৰ ফুলাৰ্টনত সংঘটিত হোৱা এক দুৰ্ঘটনাৰ তথ্য লাভ কৰে। সৰু বিমানখনে অট্টালিকাৰ চাদত খুন্দা মাৰি দুৰ্ঘটনাগ্ৰস্ত হয়। বিমানখনত অগ্নিকাণ্ড সংঘটিত হোৱাৰ ফলত এটা গুদামৰ ক্ষতিসাধন হয়। এই গুদামত চিলাই মেচিন আৰু কাপোৰৰ ষ্টক ৰখা হৈছিল।
