কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীয়ে দুৰ্ঘটনাগ্ৰস্ত লোকৰ বাবে ‘নগদবিহীন চিকিৎসা’ আঁচনিৰ ঘোষণা কৰিছে। এই আঁচনিৰ অধীনত পথ দুৰ্ঘটনাত পতিত হোৱা লোকৰ চিকিৎসাৰ বাবে চৰকাৰে ১.৫ লাখ টকা পৰ্যন্ত ব্যয় কৰিব।
এই আঁচনিৰ কথা ঘোষণা কৰি নীতিন গাডকাৰীয়ে কয়, ‘আমি ‘নগদবিহীন চিকিৎসা’ নামৰ এক নতুন আঁচনি আৰম্ভ কৰিছো। এই আঁচনিৰ অধীনত দুৰ্ঘটনা সংঘটিত হোৱাৰ ২৪ ঘন্টাৰ ভিতৰত চিকিৎসালয়ত ভৰ্তি হোৱা ৰোগীৰ সাত দিনৰ চিকিৎসাৰ খৰচ চৰকাৰে বহন কৰিব।’
এই আঁচনিৰ অধীনত দুৰ্ঘটনাগ্ৰস্ত ব্যক্তিজনৰ চিকিৎসাৰ বাবে সৰ্বাধিক ১.৫ লাখ টকা খৰচ কৰিব। অৱশ্যে এই আঁচনিৰ সুবিধা লাভ কৰিবলৈ ২৪ ঘণ্টাৰ ভিতৰত দুৰ্ঘটনাৰ খবৰ আৰক্ষীক প্ৰদান কৰিব লাগিব। ইয়াৰ উপৰি হিট এণ্ড ৰাণ ঘটনাত মৃত্যু হোৱা লোকৰ আত্মীয়ক প্ৰদান কৰিব ২ লাখ টকাৰ এককালীন সাহায্য।
দিল্লীত ৰাজ্য আৰু কেন্দ্ৰীয় শাসিত ৰাজ্যসমূহৰ পৰিবহন মন্ত্ৰীসমূহৰ সৈতে হোৱা বৈঠকৰ পিছতে কেন্দ্ৰীয় পৰিবহন মন্ত্ৰীয়ে এই আঁচনিৰ ঘোষণা কৰে। এই বৈঠকৰ লক্ষ্য আছিল পৰিবহন নীতি উন্নত কৰা আৰু পথ সুৰক্ষা বৃদ্ধিৰ বাবে কেন্দ্ৰ আৰু ৰাজ্য চৰকাৰৰ মাজত সহযোগিতা বৃদ্ধি কৰা।
