ঐতিহ্য ৰক্ষা কৰি পুণৰ হাজোত অনুষ্ঠিত হৈছে সমন্বয় শোভাযাত্ৰা। তীৰ্থনগৰীত দাঙি ধৰা হৈছে ঐক্য-শান্তি-সম্প্ৰীতিৰ এক সুন্দৰ নিদৰ্শন।
১৯৯২ চনত যেতিয়া বাবৰি মছজিদ ধ্বংস হৈছিল, সেই সময়তে দেশৰ অধিকাংশ ৰাজ্যতে বৃদ্ধি পাইছিল হিন্দু-মুছলমানৰ মাজত সংঘাত।
সেইসময়ত শান্তি, সম্প্ৰীতি আৰু ভাতৃত্ববোধৰ পৰিচয় দিছিল অসমে বাবৰি মছজিদ ধ্বংসৰ সময়তে হাজোবাসীয়ে লৈছিল এটা পণ আৰু তেতিয়াৰ পৰাই আৰম্ভ হৈছিল পোৱামক্কাৰ প্ৰবেশদ্বাৰৰ পৰা হয়গ্ৰীৱ মাধৱ মন্দিৰৰ প্ৰাংগণলৈ সমন্বয় শোভাযাত্ৰাৰ পৰম্পৰা।
এই ঘটনাৰ প্ৰায় ৩টা দশক পাৰ হৈ গ’ল যদিও এই সংকল্প পাহৰা নাই হাজোবাসীয়ে। পুনৰ ধৰ্মীয় বিভেদ পাহৰি একেখন আকাশৰ তলতেই একত্ৰিত হ’ল হিন্দু-মুছলমানসকলো।
পঞ্চতীৰ্থ পৰিচালনা সমিতিৰ দলৈ আৰু পোৱামক্কা দৰগাহ শ্বৰীফৰ খাদীমে এই শোভাযাত্ৰাৰ উদ্বোধন কৰে৷ দুটা পৃথক ধৰ্মৰ গুৰিয়াল দুগৰাকীয়ে আলিংগন কৰি সমগ্ৰ দেশবাসীৰ ওচৰত দাঙি ধৰে ভাতৃত্ববোধৰ নিদৰ্শন৷
মণিকূট উৎসৱ আৰু সমন্বয় শোভাত্ৰাৰ এই মহৎ উদ্দেশ্যক বাস্তৱ ৰূপ দিলে হাজো আঞ্চলিক ছাত্ৰ সন্থা আৰু সদৌ অসম ছাত্ৰ সন্থাই৷ জাতি-বৰ্ণ নিৰ্বিশেষে এই শোভাযাত্ৰা অংশ ল’লে শ শ লোকে।
শোভাযাত্ৰাত প্ৰদৰ্শিত হল বিহুকে ধৰি বিভিন্ন জনগোষ্ঠীয় নৃত্য। এই শোভাযাত্ৰাত অংশ ললে লোকসংগীত সম্ৰাট খগেন গগৈ, কণ্ঠশিল্পী দিক্ষু শৰ্মা, দীপলিনা ডেকা, কামৰূপ জিলাৰ আয়ুক্ত দেৱ কুমাৰ মিশ্ৰকে ধৰি ভালেসংখ্যক লোক।
