দিল্লী বিধানসভা নিৰ্বাচনৰ বাবে চলাই থকা প্ৰচাৰ কাৰ্যসূচীৰ মাজতে আপ প্ৰধান তথা দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱালৰ সৈতে সংঘটিত হৈছে এক অবাঞ্চিত ঘটনা।
প্ৰচাৰৰ সময়তে অৰবিন্দ কেজৰিৱালৰ বাহনত কোনো দুৰ্বৃত্তই শিল নিক্ষেপ কৰিছে। লগে লগে এই ঘটনাক লৈ হাহাকৰাময় পৰিৱেশৰ সৃষ্টি হয়। অৱশ্যে আৰক্ষীয়ে এই ঘটনাৰ তদন্ত আৰম্ভ কৰিছে।
ইফালে এই আক্ৰমণৰ ঘটনাৰ পিছতে শাসক-বিৰোধীৰ মাজত আৰম্ভ হৈছে বাকযুদ্ধ। কেজৰিৱালৰ ওপৰত সংঘটিত হোৱা আক্ৰমণৰ বাবে আপে বিজেপিক দোষাৰোপ কৰাৰ বিপৰীতে বিজেপিয়ে অভিযোগ কৰে যে কেজৰিৱালে নিজৰ গাড়ীৰে দুজন যুৱকক খুন্দিয়াইছে।
আপে প্ৰতিক্ৰিয়া প্ৰকাশ কৰি কয় যে অৰবিন্দ কেজৰিৱালৰ ওপৰত পৰৱেশ বাৰ্মাৰ গুণ্ডাবাহিনীয়ে আক্ৰমণ চলায়। নতুন দিল্লী বিধানসভা সমষ্টিত প্ৰচাৰ কাৰ্যত ব্যস্ত থকাৰ সময়তে এই আক্ৰমণ সংঘটিত কৰে। স্থানীয় লোকে বিজেপিৰ গুণ্ডাবাহিনীক খেদি পঠিয়ায়। বিজেপিৰ এই আক্ৰমণক কেজৰিৱালে ভয় নকৰে আৰু ইয়াৰ উচিত প্ৰত্যুত্তৰ দিল্লীৰ জনতাই দিব বুলিও কয়।
ইফালে পৰভেশ ভাৰ্মাৰ তৰফৰ পৰা জাৰি কৰা মন্তব্যত কোৱা হৈছে যে প্ৰশ্ন সোধা জনসাধাৰণৰ ওপৰত অৰবিন্দ কেজৰিৱালে নিজৰ গাড়ীৰে দুজন যুৱকক খুন্দিয়াইছে। দুয়োজনকে হাস্পতালত ভৰ্তি কৰোৱা হৈছে। পৰাজয় দেখি সাধাৰণ নাগৰিকৰ প্ৰাণৰ মূল্য পাহৰি গৈছে। মই হাস্পতাললৈ গৈ আছো।
এই ঘটনাক লৈ সম্প্ৰতি শাসকীয় দল আপ আৰু বিৰোধী বিজেপিৰ মাজত তীব্ৰ বাক্যবাণ চলা পৰিলক্ষিত হৈছে।
