উত্তৰ প্ৰদেশৰ প্ৰয়াগৰাজত চলি থকা মহাকুম্ভ মেলাৰ পৰা উভতি অহা পথত সংঘটিত এক ভয়ংকৰ পথ দুৰ্ঘটনাত হায়দৰাবাদৰ ৭ গৰাকী ভক্তৰ মৃত্যু হৈছে। মধ্য প্ৰদেশৰ ছিহৰাৰ সমীপৱৰ্তী ৩০ নং ৰাষ্ট্ৰীয় ঘাইপথত সংঘটিত এই দুৰ্ঘটনাটোত আন দুজন লোক আহত হোৱা বুলিও জানিব পৰা গৈছে।
দুৰ্ঘটনাত পতিত হৈ কৰুণ মৃত্যুক সাৱটি লোৱা লোকসকল মেডচাল মালকাজগিৰি অঞ্চলৰ পৰা মহাকুম্ভ মেলালৈ আহিছিল।
লাভ কৰা খবৰ অনুসৰি, আজি ৰাতিপুৱা প্ৰায় ৯.১৫ বজাত মোহলা-বাৰগিৰ সমীপত ভক্তসকলে আহি থকা বাহনখনে এখন ট্ৰাকত প্ৰচণ্ড জোৰত খুন্দিয়ায়। এই খুন্দাৰ ফলত ৭ জন লোকৰ মৃত্যু হোৱাৰ লগতে আহত হোৱা লোক দুজনক স্থানীয় প্ৰশাসনে হাস্পতাললৈ প্ৰেৰণ কৰে।
দুৰ্ঘটনাৰ খবৰ লাভ কৰাৰ লগে লগে উপায়ুক্ত, আৰক্ষী অধীক্ষককে ধৰি স্থানীয় প্ৰশাসনৰ কিছু বিষয়া ঘটনাস্থলত উপস্থিত হৈ উদ্ধাৰ কাৰ্যৰ বুজ লোৱাৰ লগতে ঘটনাৰ প্ৰাথমিক তদন্ত আৰম্ভ কৰে।
কি কাৰণত তথা কাৰ ভুলৰ বাবে এই ভয়ংকৰ পথ দুৰ্ঘটনাটো সংঘটিত হ’ল সেই কথা এই পৰ্যন্ত জানিব পৰা হোৱা নাই।
